Aravot.am-ը Հայաստանի Հանրային ռադիոընկերության տնօրեն Գարեգին Խումարյանից հետաքրքրվեց՝ շարունակո՞ւմ է չհամաձայնել Հանրային հեռարձակողի խորհրդի պնդման հետ, թե Նիկոլ Փաշինյանի արտահայտած տեսակետները վիճարկող իր հոդվածով չարաշահել է լիազորությունները եւ պաշտոնը: Նա «Ազատությանն» ասել էր, որ խորհրդի հայտարարության մասին հայտնել է «զուտ ինտուիտիվ, միջանկյալ տեսակետ», որ վերաբերյալ վերջնական գնահատական կտան ընկերության իրավաբանները:
«Դեռ չենք հանդիպել, կարծում եմ՝ այսօր կլինի իրավաբանների վերջնական գնահատականը»,-ասաց Հայաստանի Հանրային ռադիոընկերության տնօրենը:
Ինչ վերաբերվում է «զուտ ինտուիտիվ» գնահատականին, այս մասին էլ նշեց. «Ինտուիտիվ բառն այստեղ կհանեի, բայց շարունակում եմ պնդել, որ ես համաձայն չեմ այդ փաստաթղթում եղած որոշ ձեւակերպումների հետ։ Այո, ես չեմ չարաշահել իմ լիազորություններն ու պաշտոնը»,-ասաց Գարեգին Խումարյանը:
Մեր հարցին՝ սոցցանցերում կարծիքներ կան, ըստ որոնց՝ Խումարյանը նման քայլի է դիմել այն պատճառով, քանի որ շուտով լրանում է պաշտոնավարման ժամկետը եւ գուցե հրաժեշտ տա զբաղեցրած պաշտոնին, Հայաստանի Հանրային ռադիոընկերության տնօրենը հետեւյալ կերպ արձագանքեց. «Պաշտոնավարման ժամկետս լրանում է ապրիլ ամսվա կեսերին, ունեմ շատ հզոր եւ մրցունակ հայեցակարգ, որով կներկայանամ հերթական ընտրությունները հաղթելու համար»:
Կարդացեք նաև
Գոհար ՀԱԿՈԲՅԱՆ
