Երեւան քաղաքի նախկին դատավոր, կալանավորված Արուսյակ Ալեքսանյանի սահմանադրական դատարան դիմումի հիման վրա՝ ՀՀ քրեական դատավարության օրենսգրքի 120-րդ հոդվածի 1-ին մասի 5-րդ կետի՝ Սահմանադրությանը համապատասխանության հարցը որոշելու վերաբերյալ» գործի դատաքննությունը մեկ անգամ հետաձգվել էր, նշանակվել այսօր՝ փետրվարի 6-ին՝ ժամը 11.00-ին: Վիճարկվող հոդվածը վերաբերվում է դատարանի կողմից սահմանված կալանքի ժամկետը լրանալու, երկարաձգման մասին դատարանի կայացրած որոշման ստանալու հարցին:
Քիչ առաջ տեղեկացանք, որ որոշում չի կայացվել, հաջորդ նիստը նշանակվել է փետրվարի 13-ին:
Հիշեցնենք, որ 2022 թ. հոկտեմբերի 3-ին ԱԱԾ քննչական դեպարտամենտում թիվ 58236222 քրեական վարույթի շրջանակում 2022 թ. հոկտեմբերի 17-ին Գլխավոր դատախազի կողմից Բարձրագույն դատական խորհուրդ է ներկայացվել 2 միջնորդություն՝ դատավորի նկատմամբ քրեական հետապնդում հարուցելու եւ ազատությունից զրկելու վերաբերյալ համաձայնություն տալու մասին: ԲԴԽ 2022 թվականի հոկտեմբերի 17-ի որոշումներով Գլխավոր դատախազի միջնորդությունները բավարարվել են: Ա. Ալեքսանյանի նկատմամբ քրեական հետապնդում է սկսվել, նա կալանավորվել է:
Արուսյակ Ալեքսանյանը մեկ անգամ չէ, որ դիմում է Սահմանադրական դատարան: Նա հասցրել էր վիճարկել ՀՀ քրեական դատավարության օրենսգրքի 398-րդ հոդվածի 3-րդ մասը (Վճռաբեկ բողոքը վարույթ ընդունելը մերժվում է, եթե Վճռաբեկ դատարանը գալիս է հետեւության, որ վարույթ ընդունելու պայմանների հիմնավորումները բավարար չեն), «ՀՀ Սահմանադրության 27-րդ հոդվածով հռչակված անձնական ազատության իրավունքին հակասող ՀՀ քրեական դատավարության օրենսգրքի 316-րդ հոդվածի 1-ի մասը՝ թիվ ՀԿԴ/0002/01/23 քրեական գործով տրված այն մեկնաբանության կամ այն բովանդակության շրջանակներում, երբ նախնական դատալսումների ընթացքում դատարանը մեղադրյալի նկատմամբ խափանման միջոց, այդ թվում՝ կալանք կարող է կիրառել՝ անկախ այն հանգամանքից, թե մինչդատական քրեական վարույթում մեղադրյալի նկատմամբ որեւէ խափանման միջոց ընտրված եղել է, թե՝ ոչ…
Կարդացեք նաև
Ըստ նրա, Հակակոռուպցիոն դատարանը թույլ էր տվել քրեադատավարական օրենքի էական խախտում, խախտել է իր՝ մեղադրյալի ազատության եւ անձնական անձեռնմխելիության սկզբունքը, քանի որ կալանքը կիրառել է ՀՀ քրեական դատավարության օրենսգրքի 121-րդ հոդվածի 1-ին մասով նախատեսված երաշխիքի խախտմամբ ու անտեսմամբ: Դիմողն ընդգծել էր, որ բոլոր այն դեպքերում, երբ լրացել է իր՝ մեղադրյալի կալանքի ժամկետը, եւ առկա չէր դատարանի որոշում՝ կալանքի ժամկետը երկարաձգելու մասին, ապա օրենքի ուժով մեղադրյալը ձեռք է բերում կալանքից ազատվածի կարգավիճակ, որպիսի փաստն էլ հենց հանդիսանում է խոչընդոտ, որ կալանքի ժամկետի երկարաձգման հարցը լուծում ստանա:
Ի դեպ, գործի վարույթն անցյալ տարվա հոկտեմբերի 3-ի աշխատակարգային որոշմամբ մասամբ կարճվել էր:
Ռուզան ՄԻՆԱՍՅԱՆ
