«ՀՀ-ում փորձ է կատարվում իրականացնել սահմանադրական հեղաշրջում, ինչի մասին անթաքույց հայտարարել են գործող վարչախմբի ղեկավարը և նրա կամակատարները»,- «Հայաքվե» նախաձեռնության հրավիրած մամուլի ասուլիսի ժամանակ հայտարարեց նախաձեռնության համակարգող Ավետիք Չալաբյանը։
Ըստ նրա՝ սահմանադրական բարեփոխումների կեղծ քողի տակ փորձ է արվում վերացնել հայկական անկախ պետականությունը, այն վերածել Թուրքիայից ու Ադրբեջանից կախման մեջ գտնվող կիսապետական կազմավորման․ «Նպատակը ՀՀ անկախության հռչակագրի չեղարկումն է, որով սահմանվում են հայության ազգային նպատակները։ Վարչախմբի ներկայացուցիչները խոստովանել են, որ անում են Բաքվի ու Անկարայի պարտադրանքով, ավելին` նրանք հայ ժողովրդին սպառնում են նոր պատերազմով»։
Ըստ նրա՝ փորձ է արվում օտարել հայությանը իր ստեղծած պետությունից, զրկել մշակութային ժառանգությունից, վերացնել հայ մարդու հիշողությունը և արժանապատվությունը։
Նա վստահեցրեց՝ վճռական հանձնառություն են ստանձնում պայքարել գործող վարչախմբի կողմից սկսած այս հակազգային ու հակապետական գործընթացի դեմ, խոչընդոտելու դրա իրականացմանը։ Նա կոչ արեց իրապես ազգային բոլորին ուժերին և մտահոգ քաղաքացիներին միանալ այս պայքարին, ձևավորել անկախության պաշտպանության միասնական ճակատ և թույլ չտալ հայկական անկախ պետականության կազմալուծումը մեր երդվյալ թշնամիների կողմից։
Կարդացեք նաև
Հարցին՝ կոնկրետ ի՞նչ գործողություններ են նախաձեռնելու, նա պատասխանեց․ «Մեր Սահմանադրությունը հստակ սահմանում է հանրաքվեի իրականացման ընթացակարգը, որ ՀՀ-ում նոր Սահմանադրության ընդունմամբ հանրաքվե իրականացվի։ Նախ` դրա որոշումը պետք է ընդունի ԱԺ-ն, Սահմանադրության իրականացվող փոփոխությունները պետք է հաստատի Սահմանադրական դատարանը, հարցը հանրաքվեի դնելուց հետո գրանցված ընտրողների մեկ քառորդը պետք է քվեարկի։ Մեր պայքարը ուղղված է լինելու նրա դեմ, որ այս իշխանությունները չկարողանան այդ փուլերը հաղթահարել»։
«Հայաքվե» նախաձեռնության խորհրդի անդամ Մենուա Սողոմոնյանը պարզաբանեց․ «Ըստ գործող Սահմանադրության 202-րդ հոդվածի՝ Սահմանադրության նախագիծը հանրաքվեի դնելու համար անհրաժեշտ է պատգամավորների ընդհանուր թվի 2/3-ի համաձայնությունը։ Կազմում է 72 պատգամավոր։ Մեր առաջնային խնդիրը պետք է լինի թույլ չտալ, որ այդ 72 պատգամավորը կողմ լինեն հակապետական նախագծի՝ հանրաքվեի դնելուն։ Ասեմ, որ «Հայաքվեն» ունի համապատասխան փորձառություն ազդելու ԱԺ-ում մթնոլորտի վրա։ Մեր նախագիծը, երբ ԱԺ լիագումար նիստերի օրակարգ էր մտնում, այդ քվեարկությանը չմասնակցեցին ՔՊ 72 պատգամավորներ, մասնակցեցին 56-ը, որոնցից երկուսը ձեռնպահ քվեարկեցին, մեկը՝ կողմ։ Հենվելով այս հանգամանքի՝ վրա մեր առաջնահերթ խնդրի վերջնական նպատակ ենք դիտարկում այն, որ թույլ չտանք կողմ քվեարկել նախագիծը՝ հանրաքվեի դրվելուն»։
Տաթև ՀԱՐՈՒԹՅՈՒՆՅԱՆ
