«Ես մի բակում եմ մեծացել, որտեղ քրեական ենթամշակույթ կրող անձ կար: Ես հիշում եմ, երբ որ մենք երեխա էինք, ընկերներով ուզում էինք, որ մենք էլ նման հնարավորություններով ընտանիքում ապրեինք, որովհետեւ այդ անձն իր ընտանիքով ապրում էր շատ բարեկեցիկ, հարց լուծող էր, մի խոսքով, շատ նախանձելի սոցիալական վիճակում էր ապրում: Հիմա, երբ հայրենական սերիալները նայում եմ, նման կերպարների հանդիպում եմ ու նույն զգացողությունն եմ ունենում, ինչ ես իմ մանկության տարիներին էի ունենում»,- այսօր ԱԺ հանձնաժողովի նիստում պատմեց ՔՊ պատգամավոր Հասմիկ Հակոբյանը:
Հանձնաժողովում քննարկվում էր ԱԺ նախագահ Ալեն Սիմոնյանի եւ ՔՊ խմբակցության քարտուղար Արթուր Հովհաննիսյանի՝ «Տեսալսողական մեդիայի մասին» օրենքում լրացում կատարելու նախագիծը, որով արգելվում է քրեական ենթամշակույթ քարոզող, բռնության տեսարաններով ֆիլմերը, հաղորդումները հանրային մուլտիպլեքսում ցուցադրել ցերեկային ժամերին:
Հասմիկ Հակոբյանը վստահեցրեց, որ քրեական ենթամշակույթը կրող կերպարները մեր սերիալներում ռոմանտիզացված են, դրա համար օրենքում բացթողում կա:
Կարդացեք նաև
«Հայաստան» խմբակցության պատգամավոր Լիլիթ Գալստյանն ասաց, որ ինքը դեմ է քրեական ենթամշակույթի տարածմանը, մանավանդ, որ հիմա հանցագործությունների թիվը անհամեմատ ավելի շատացել է, քան ՔՊ-ի կողմից հիշատակվող «նախկինների» ժամանակ: Բայց նա նախագծին կողմ չէր, քվեարկեց ձեռնպահ: Հանձնաժողովում նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
