Գյումրու նորընտիր փոխքաղաքապետ Լուսինե Սանոյանը շարունակում է իր նախաձեռնած գովազդային արշավը՝ թափառող կենդանիներին տուն տանելու, որդեգրելու թեմայով։
Անդրադարձել ենք, որ օրեր առաջ քաղաքի կենտրոնում հայտնվել էր սոցիալական գովազդ՝ շան նկարով, որտեղ կենդանին հորդում էր իրեն տուն տանել։
Այսօր թափառող կենդանիների նոր լուսանկարներն են հայտնվել՝ ավելի հուզիչ գրառումներով՝ «Որդեգրեք, մի գնեք մեզ․ Ես կլինեմ քո լավագույն ընկերը», «Ես քո սիրո ու ջերմության կարիքն ունեմ»։
Կարդացեք նաև
Մեկ անգամ ևս հիշեցնենք, որ Գյումրիում թափառող կենդանիների խնդիրն ամենահրատապն է․ չկա որևէ ավագանու նիստ, որտեղ նրանց ապաստարանների անհրաժեշտության թեման չարծարծվի, գրեթե չկա նաև այդպիսի օր, որ շների հարձակման դեպքեր չգրանցվեն։
Ու քանի դեռ թափառող կենդանիների խնդրին խելամիտ լուծում տրված չէ․ թաղեր կան, որտեղ մարդիկ ահուդողով են մտնում․ Գյումրիում շարունակվում է հակասական վերաբերմունքը նրանց հանդեպ։
Բնակիչներից ոմանք իրենց բակի շներին տիրություն են անում, կերակրում, ոմանք էլ նյարդայնանում են, շներին սատկեցնելու, ոչնչացնելու կոչեր հնչեցնում։
Ու մինչ ապաստարանների հարցի լուծումը․ Գյումրու քաղաքապետարանն, իր հերթին, սոցիալական գովազդներով մարդասիրության կոչեր է հնչեցնում։
Նունե ԱՐԵՎՇԱՏՅԱՆ
