Հայաստանում սպասված ու սիրված ակորդեոնահար, բանդոնեոնահար Մարիո Ստեֆանո Պիետրոդարկին և ջութակահար Անդրես Գաբետտան Երևանում Հայաստանի պետական սիմֆոնիկ նվագախմբի լարային կազմի հետ ներկայացրին «Տարվա եղանակները» խորագրով համերգային ծրագիրը։ Երաժիշտներն այն կատարել են տարբեր երկրներում: Ծրագրի հիմքում Անտոնիո Վիվալդիի «Տարվա եղանակները» և Աստոր Պիացոլլայի «Բուենոս Այրեսի տարվա չորս եղանակները» ստեղծագործություններն էին՝ Ռոբերտո Մոլինելլիի մշակմամբ:
Երեկոն մեծ ընդունելության արժանացավ, լեփ-լեցուն դահլիճը չդադարող ծափերով էր ուղեկցում երաժիշտների կատարումները։
Ունկնդիրը սիրում է Վիվալդիի «Տարվա եղանակները», ո՞րն է դրա գաղտնիքը։ Անդրես Գաբետտան նկատում է, որ այդ ստեղծագործությունը լի է էմոցիաներով, ահա թե ինչու է այն ժամանակի մեջ միշտ սիրված։ Վիվալդին մեծ տաղանդ է, նա գրել է բազմաթիվ ստեղծագործություններ, անդրադարձել է բազմաթիվ պոպուլյար թեմաների, ինչն էլ հաջողություն է բերել նրա երաժշտությանը։ Վիվալդին, ըստ երաժշտի, ունի իր յուրահատուկ ձեռագիրը։ Գաբետտան նշում է, որ որպես ջութակահարի՝ իր համար հատկապես հոգեհարազատ է «Տարվա եղանակների» «Աշունը»։ Անդրես Գաբետտան երեկոյի ընթացքում հանդես եկավ և՛ որպես ջութակահար, և՛ որպես դիրիժոր։ Նրա խոսքով, իհարկե, կատարողական որոշ բարդություն դրանում կա, բայց նաև մեծ բավականություն է ստանում համերգի ընթացքում այդ երկուսը համադրելիս։ Գաբետտան նաև նշում է, որ բանդոնեոնահար Մարիո Ստեֆանո Պիետրոդարկի առաջարկով է եկել Հայաստան, ով մշտապես հիացմունքով է արտահայտվել հայ ունկնդրի վերաբերյալ։ Խոսելով Հայաստանի պետական սիմֆոնիկ նվագախմբի հետ համագործակցության մասին՝ նա ընդգծում է, որ այստեղ հիանալի երաժիշտներ են աշխատում՝ լի կյանքով ու երաժշտությամբ, այնպես որ՝ ինքը շատ ուրախ է լինել Երևանում ու հանդես գալ Սիմֆոնիկ նվագախմբի հետ։
Մարիո Ստեֆանո Պիետրոդարկին, բազմաթիվ անգամներ է ելույթ ունեցել Երևանում՝ միշտ լեցուն դահլիճներում իր զգացմունքային կատարումներով հիշարժան պահեր պարգևելով ունկնդրին ու արժանանալով լավագույն ընդունելության։ Պիետրոդարկին իր այս այցելությունը համարում է հատուկ և ընդգծում՝ ուրախ է, որ հանդիսատեսը կրկին ունկնդրեց իր գործիքի հնչյունները, ինչպես նաև Վիվալդիի ու Պիացոլլայի ստեղծագործությունները մի երեկոյի ընթացքում։
ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
