Ինչպես տեղեկացրել ենք, այսօր Երևան քաղաքի ընդհանուր իրավասության դատարանի Աջափնյակ նստավայրում արցախցի 11 երիտասարդների դատական նիստն էր: Նրանք, այդ թվում՝ Տաթեւիկ Վիրաբյանը, սեպտեմբերի 19-ին Հանրապետության հրապարակում մասնակցում էին հանրահավաքին եւ այսօր նրանց մեղադրանք է առաջադրվել զանգվածային անկարգությունների, ոստիկանների եւ կառավարական շենքի վրա շշեր, տարբեր առարկաներ նետելու, վնասվածքներ պատճառելու, հասարակության անդորրը խախտելու համար:
Լրագրողների հետ զրույցում պաշտպան Հովհաննես Խուդոյանն ասաց, որ ներկայումս մեղադրյալներից 4-ը կալանքի տակ են, 7-ի նկատմամբ այլ խափանման միջոց է ընտրվել. «Այստեղ իրականում իրավաբանության հետ կապ չունեցող որոշում է կայացվել: Աչքաչափով որոշել են՝ ով որ զանգվածային անկարգություն անելու մեջ է մեղադրվում, եկեք պահենք, ով որ խուլիգանությանն մեջ է՝ եկեք բաց թողնենք: Մեկ-երկու բացառություն եղել է, բայց այնտեղ առանձին հատուկ հանգամանքներ կային»:
Փաստաբանն ասաց, որ պահանջելու են, որ այս գործով տուժած ճանաչված ոստիկանները գան դատարան ու ցուցմունք տան. «Հուսով եմ՝ հաջորդ դատական նիստերը կկայանան եւ դուք էլ ականատես կլինեք այն տեսանյութերին, որի մասին այդքան շատ խոսում են: 12 տուժող կա մոտ, բայց խնդիրը որն է՝ մենք չունենք տվյալ եւ գործում էլ չկա, որ այդ ոստիկանները տուժել են հենց այս անձանց գործողություններից: Նշել են, որ ծառայության մեջ են եղել, ինչ-որ առարկաներից վնասվածքներ են ստացել: Այդ փաստը չենք էլ վիճարկում, որովհետեւ ինչ-որ առարկա եկել է, բայց դա ի՞նչ կապ ունի այս մեղադրյալների հետ՝ դա ուրիշ խնդիր է»:
Ուշագրավ է, որ ամբաստանյալներին մեղադրում են պլաստիկե ջրի շշերով ոստիկաններին հարվածելու մեջ, բայց այդ շշերից մատնահետք չի վերցվել ու չեն նույնականացրել մատնահետքը ամբաստանյալների հետ. «Կարող էին այդ հանգամանքները պարզել, բայց քննությունը վկայում է, որ ընդհանրապես դրա ցանկությունը չի եղել»:
Կարդացեք նաև
Հռիփսիմե ՋԵԲԵՋՅԱՆ
