Մինչ Գյումրիում բուռն քննարկման է ենթարկվում թափառող կենդանիների խնդիրը․ ավագանու տարբեր խմբակցությունների ներկայացուցիչներ ամեն մի նիստին իրենց ելույթներում հիշեցնում են նրանց համար ապաստարաններ կառուցելու անհրաժեշտության մասին, գյումրեցիներից շատերն էլ ահազանգում են շների կողմից հարձակման ենթարկվելու ու վնասվածքներ ստանալու մասին, մի քանի օր է՝ քաղաքի կենտրոնական փողոցներում հայտնվել են շներին որդեգրելու կոչ անող ցուցապաստառներ։
Այն, որ թափառող կենդանիների խնդիրը պիտի լուծվի, քանի որ իրավիճակն իրոք անտանելի է, երբեմն անկառավարելի (ԱԺ -ում Մարդու իրավունքների պաշտպանության եւ հանրային հարցերի մշտական հանձնաժողովի անդամ Արեգնազ Մանուկյանի նախաձեռնությամբ այսօր կազմակերպած «Թափառող կենդանիների խնդիրը Հայաստանում և լուծման տարբերակները» թեմայով քննարկման ժամանակ ՀՀ ոստիկանության պետի տեղակալ Կարեն Հակոբյանը ներկայացրեց, որ մարզերից առավել շատ թափառող կենդանիների վերաբերյալ ահազանգեր ստացել են Շիրակից, Արմավիրից, Լոռուց և Կոտայքից) երկրորդ կարծիք լինել չի կարող, բայց նույնքան անտանելի է հասարակության որոշ անդամների ագրեսիվ վերաբերմունքը կենդանիների հանդեպ, նրանց երկրի երեսից բնաջնջելու, ոչնչացնելու պահանջը։
Ինչպես նկատում է « Շիրակ կենտրոն» ՀԿ նախագահ Վահան Թումասյանը․ «Գյուղի շները՝ ի տարբերություն քաղաքի շների, բացի գայլերից ուրիշ թշնամիներ չունեն»։
Կարդացեք նաև
Գուցե և մարդկանց նման պահանջն է պատճառ դարձել, որ Գյումրիում հայտնվեն գովազդային վահանակներ՝ շան նկարով ու քաղաքապետարանի հորդորով՝ «Տուն տարեք»։
Սոցիալական գովազդի մտահաղացումը Գյումրու նորընտիր փոխքաղաքապետ Լուսինե Սանոյանինն է։ Նա իր էջում տեղադրել է կոչը՝ շան լուսանկարով՝ գրելով․ «Գյումրու համայնքապետարանի գովազդի բաժնի հետ համատեղ սոցիալական գովազդ, որի նպատակն է կենդանիների որդեգրումը: Շնորհակալություն ընկերությանը, որը սիրով ընդունեց գաղափարը»:
Նունե ԱՐԵՎՇԱՏՅԱՆ
