Հունվարի 23-ին ՀՀ Վայոց ձորի մարզպետ Կոլյա Միքաելյանն ընդունեց Հայաստանում ՄԱԿ-ի Փախստականների գործակալության ներկայացուցիչ Կավիտա Բելանիին, ինչպես նաև կազմակերպության իրավական հարցերով պատասխանատու Էլիաս Նգուգիին և Գորիսի գրասենյակի ղեկավար Սահականուշ Եղիազարյանին: Այցի նպատակն էր քննարկել Լեռնային Ղարաբաղից բռնի տեղահանված անձանց խնդիրները, իրականացված աջակցման ծրագրերը և հետագա անելիքները:
Ողջունելով հյուրերին՝ մարզպետ Կ. Միքաելյանը շնորհակալություն հայտնեց հյուրերին՝ և՛ 2020թ. , և՛ 2023թ. իրադարձություններից հետո Վայոց ձորի մարզում ապաստանած ընտանիքներին և նրանց ընդունող համայնքներին ուղղված աջակցման և համայնքահեն ծրագրերի իրականացման համար համար: Նա նշեց, որ պատկան կառույցները քաջատեղյակ են ՄԱԿ ՓԳՀ մարդասիրական առաքելության մասին և բարձր են գնահատում կազմակերպության ջանքներն ու արձանագրված արդյունքները՝ հատկանշելով առաջնային անհրաժեշտության պարագաների բաշխումն ու ձմռան հետևանքների մեղմմանն ուղղված միջոցառումների ժամանակին և արդյունավետ իրականացումը:
Շնորհավորելով մարզպետին իր նոր պարտականությունները ստանձնելու կապակցությամբ՝ Կավիտա Բելանին կարևորեց ՄԱԿ ՓԳՀ-ի և Վայոց ձորի մարզի միջև համագործակցության լավ փորձը՝ հույս հայտնելով, որ այն կլինի շարունակական, առավել սերտ և արդյունավետ։
Դրական գնահատվեցին ընդունող համայնքների՝տեղահանված ընտանիքների նկատմամբ ջերմ վերաբերմունքը և նրանց առավել թիրախային աջակցություն ցուցաբերելու պատրաստակամությունը։ Հանդիպման ընթացքում մարզպետի կողմից ներկայացվեց նաև մարզում Լեռնային Ղարաբաղից բռնի տեղահանված անձանց բաշխվածության պատկերը ըստ համայնքների, ինչպես նաև նրանց առկա կարիքները և դրանց լուծմանն ուղղված գործողությունները։
Կարդացեք նաև
Հյուրերը քննարկեցին դիմակայունությանն ու տնտեսական զարգացմանն ուղղված ծրագրերի պլանավորման և իրականացման կարևորությունը, ինչպես նաև տեղահանված անձանց կարգավիճակին առնչվող մի շարք իրավական հարցեր՝ շեշտելով բռնի տեղահանված անձանց համար իրազեկման աշխատանքների պատշաճ կազմակերպման և իրականացման անհրաժեշտությունը։
Վայոց ձորի մարզպետ Կ․ Միքաելյանը պատրաստակամություն հայտնեց աջակցելու ՄԱԿ ՓԳՀ-ի կողմից Վայոց ձորի մարզում նախատեսված ծրագրերի իրականացմանը։
Վայոց ձորի մարզ կատարած այցի շրջանակներում ՄԱԿ ՓԳՀ գործընկերներն այցելեցին նաև Արենի բնակավայրում գործող երիտասարդական կենտրոն, որն արդեն հարազատ վայր է դարձել ԼՂ-ից տեղահանված երիտասարդների համար։ Նրանց համայնքային կյանքին ինտեգրելու, նոր ընկերներ և հնարավորություններ ձեռք բերելու նպատակով ՄԱԿ ՓԳՀ-ն կենտրոնին տրամադրել էր գույք և տեխնիկական աջակցություն։
Վայոց ձորի մարզպետի աշխատակազմ
