Արտակարգ եւ լիազոր դեսպան Ձյունիկ Աղաջանյանը «Հայելի» ակումբում անդրադառնալով գործող իշխանությունների՝ մամուլի նկատմամբ իրականացվող քաղաքականությանը՝ ասաց. «Ընդհանրապես մամուլի հանդեպ ոտնձգությունների հետ կապված կուզեի հատուկ շեշտադրում անել, որովհետեւ նմանատիպ գործելաոճը այս իշխանությունների վեց տարվա ժամանակահատվածում միշտ առանձնացել է այն հատուկ ժամանակներում, երբ նրանք հերթական կորստին են պատրաստվել, այսինքն՝ հանձնմանը եւ այլն: Եվ սկսել են մամուլի հանդեպ ոտնձգություններ եւ սահմանափակումներ իրականացնել: Ես հիշեմ, որ 2021 թվականի ապրիլին, պատերազմից հետո առաջին օրենքը ընդունվեց սահմանային գոտում լրագրողների գործունեությունը սահմանափակելու հետ կապված: Եվ 2-3 շաբաթ անց տեսանք ադրբեջանական զորքերի դիրքավորումը Սյունիքի բարձունքներում: Անգամ այդ ժամանակ մենք հերթական անգամ գերիների բաժինը տվեցինք ադրբեջանցիներին:
Պատերազմի օրերին դեռեւս հանրության համար դա ինչ որ մի տեղ ընդունելի համարվեց, որովհետեւ նրանց համար դեռեւս պարզ չէր այս իշխանությունների իրական մտադրությունները եւ դեմքը: Այն ընդհանուր մոտեցումը կար, որ բոլորս փորձենք համախումբ լինել, որպեսզի թույլ չտանք թշնամուն պառակտել հանրությունը եւ պառակտել մեր ուժերը: Սակայն դա ի չարս օգտագործվեց գործող իշխանությունների կողմից: Իսկ հետագա տարիներին մենք մշտապես տեսել ենք այդ ձեռագիրը, երբ հերթական կորստին, զոհին են նախապատրաստվում«:
Տիկին Աղաջանյանի խոսքով, այդ ամենը արվում է տեղեկատվական դաշտը չեզոքացնելու, ընդդիմադիր դաշտը հնարավորինս պառակտելու եւ հանրային այն շերտին, որը հասկանում է եւ չի ուզում որեւէ կերպ աջակցել նրանց գործողություններին, ցաք ու ցրիվ անելու համար: Ու որպես ասածների հիմնավորում, հիշեց Երեւանի ավագանու ընտրությունները, երբ նմանատիպ մի անձնավորություն ի հայտ եկավ իր «ողջ գեղեցիկ» պատկերով: Ու հանրության մի ամբողջ շերտ խաբվելով՝ տուրք տվեց նման գործելաոճի: Այսօր կարեւոր է, որ մեր հանրությունը հասկանա նպատակը, ճիշտ զատի գործողությունների դաշտը, որպեսզի ինքը չընկնի այդ թակարդը:
Աշոտ ՀԱԿՈԲՅԱՆ
