«Այդ պրիզմայով պետք չէ սա դիտարկել։ Տեղի ունեցածը հետևյալի մասին է՝ Ադրբեջանը երկար ժամանակ չէր կատարում ԵԽԽՎ-ում իր ստանձնած պարտավորությունները և այդ՝ չկատարման մեջ, բնականաբար, մտնում են նաև այն թեմաները, որոնք կապված են ԼՂ-ի հետ, և սա չէր կարող երկար շարունակվել։ Սա ԵԽԽՎ-ի կողմից համարժեք քայլ էր դրան ի պատասխան»,-Aravot.am-ի հարցին՝ ինչպե՞ս կմեկնաբանեք կատարվածը՝ սա որպես հաղթանա՞կ կարելի է համարել մեզ համար, թե, ընդհակառակը, Ադրբեջանը, մեկ տարի չլինելով ԵԽԽՎ-ում, կդառնա ավելի անկառավարելի, այսպես պատասխանեց ԵԽԽՎ-ում հայկական պատվիրակության ղեկավար Ռուբեն Ռուբինյանը։
Ինչպես արդեն տեղեկացրել ենք, Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի լիագումար նիստի ընթացքում անցկացված քվեարկությամբ Վեհաժողովը որոշեց չհաստատել ԵԽԽՎ-ում ադրբեջանական պատվիրակության անդամների հավատարմագրերը։
Ադրբեջանն առնվազն մեկ տարի չի լինի ԵԽԽՎ-ում։ Ռուբեն Ռուբինյանից հետաքրքրվեցինք՝ ինչպե՞ս կմեկնաբանի ադրբեջանական պատվիրակության՝ մինչև քվեարկությունը ԵԽԽՎ-ն լքելու մասին հայտարարության տարածումը։ Նա արձագանքեց․ «Բոլորի համար ակնհայտ էր, որ այս որոշումն ընդունվելու է․ դա անխուսափելի է, և իրենք այդ քայլին գնացին, որ ցույց տան, թե իբր իրենք են լքում»։
Փաստեցինք՝ ադրբեջանական պատվիրակության հավատարմագրերի հարցով քննարկման ժամանակ բոլոր քաղաքական խմբերի խոսնակները կողմ արտահայտվեցին հավատարմագրերը չհաստատելուն բացի պահպանողականների խմբի խոսնակ, ուկրաինացի պատվիրակ Օլեկսի Գոնչարենկոյից, որը հայտարարեց, թե ադրբեջանցի գործընկերներին հեռացնելը ոչինչ չի տա, և սպասում են նրանց Վեհաժողովում։ Ռուբեն Ռուբինյանն ասաց․ «Կոնսերվատիվների խումբը միշտ էլ պրոադրբեջանական դիրքորոշումներով է աչքի ընկել, և դա զարմանալի չէր։ Բայց մյուս բոլոր խմբերն ունեին կոնսենսուս։ Դիրքորոշումը նույնն էր»։
Կարդացեք նաև
Ռուբեն Ռուբինյանի հետ հարցազրույցն ամբողջությամբ՝ «Առավոտ»-ում։
Տաթև ՀԱՐՈՒԹՅՈՒՆՅԱՆ
