«Մեզ վարժեցնում են անօրինականությանը, մեզ վարժեցնում են պետական մակարդակով այնպիսի իրավական կամայականության դրսեւորումներին, որոնք մենք չենք տեսել: Կարծում եմ, հիմա շատ քիչ պետություններ կան, որտեղ մարդուն առեւանգում են, այնպես են հոգեբանական ճնշում գործադրում, որ նա ստիպված թողնի երկիրը ու հեռանա: Դա աննախադեպ է: Մենք 30 տարի շարունակ ՀԿ-ներով պայքարում էինք, որ իսպառ վերացնենք այդպիսի դեպքերը:
Ինչո՞ւ եմ ասում, որ դա առեւանգում է: Շատ պարզ պատճառով: Եթե մարդը գործել է հանցագործություն, եթե մարդն օրինազանց է՝ ձեւ կա: Ոչ մի տեղ չկա օրենքով գրված, որ նրան պետք է որեւէ տեղից առանց զգուշացնելու, հնարավորություն չտալով իրավաբան ունենալու իր հետ եւ մնացած բոլոր բաները, դա առեւանգում է, դա խայտառակություն է: Խոսքը մեկ երիտասարդ կնոջ մասին չէ: Խոսքը խայտառակության մասին է մեր երկրի իրողությունների մեջ:
Երբ խոսում են, թե ինչպես է եղել նախկիններում եւ այլն, կցանկանայի դրան անդրադառնալ: Վերջերս ես զրուցելու ժամանակ ասացի, որ եթե Արցախը հանձնել են, որովհետեւ նախկինները սա են արել, նա են արել: Դուք ինչո՞ւ եք ընտրել այս իշխանություններին: Որ շարունակեն, դիցուք, նախկինների սխալնե՞րը: Դուք պիտի հստակ իմանաք, որ դուք ընտրել եք, որովհետեւ ձեզ ասել են, որ նախկինները սխալ են եղել՝ մենք հիմա գալիս ենք փրկելու: Հիմա այդ պարզ տրամաբանությունը ո՞ր մեկիդ պարզ չի: Ես չեմ ուզում ձեզ վիրավորել եւ ասել, որ դուք չեք հասկանում այդքանը: Դուք հրաշալի դա հասկանում եք: Ու կոչ եմ անում. ձեզ քաղաքացու պես պահեք:
Ընդունեք, որ դուք մասնակցում եք եւ Արցախի 150 հազար հայրենակիցների տունն եք քանդել: Եվ «տնաքանդ» հայկական ասվածը վերաբերում է բոլոր նրանց, որոնք փնտրում են մեղավորներ չգիտեմ որ տարիներից՝ Ուրարտուից, թե ցարական Ռուսաստանից, Դուք եք այդ տնաքանդը: Եվ մեղավորներին հեռու մի փնտրեք:
Կարդացեք նաև
Եթե մինչ այսօր դուք ձեզ թույլ եք տալիս ասել. «Էս ինչի չի արել, էն ինչի չի արել», դուք ձեզնից հարցրեք, թե ինչ եք արել դուք: Դուք ընտրել եք իշխանություն, որը ձեզ խաբել է, եւ այսօր եւս դուք շարունակում եք իրենց պաշտպանել»,- այսօր ասաց առաջին ՄԻՊ Լարիսա Ալավերդյանը «Հայելի» ակումբում:
Աշոտ ՀԱԿՈԲՅԱՆ
