«Դժվար է ստորագրությունը հետ կանչել մի բանից, որը մեծ հաշվով` չի գործում։ Ինչի մասին է խոսքը, երբ երեք կողմերից երկուսը մի շարք կետերով խախտել են եռակողմ հայտարարությունը»,-այս մասին այսօր ՀՀ ԱԳՆ-ում հրավիրված ասուլիսում ասաց արտգործնախարար Արարատ Միրզոյանը՝ պատասխանելով հարցին՝ վերջին շրջանում դիտարկումներ են հնչում, որ Ադրբեջանն ու ՌԴ-ն չեն կատարում նոյեմբերի 9-ի եռակողմ հայտարարության պարտավորությունները, ինչո՞ւ է Հայաստանը շարունակում հավատարիմ մնալ հայտարարությանը, եւ ինչո՞ւ հետ չի կանչում ստորագրությունը։
Միրզոյանի խոսքով՝ ՀՀ-ն մշտապես հավատարիմ է եղել ու այսօր էլ հավատարիմ է հայտարարության այն հատվածին, որը ստանձնել է․ «Մյուս երկու կողմերն այդպես չեն վարվել, ապացույցներն առավել քան տեսանելի են առաջին հերթին՝ Լեռնային Ղարաբաղի եւ Լաչինի միջանցքի մասով»։
Նելլի ԲԱԲԱՅԱՆ
