Այսօր հրավիրած ասուլիսում ՀՀ արտաքին գործերի նախարար Արարատ Միրզոյանին հարց ուղղվեց այն մասին, որ Արցախում էթնիկ զտման օրերին Նիկոլ Փաշինյանը հայտարարեց, որ «Լեռնային Ղարաբաղի քաղաքացիական բնակչությանն ուղիղ սպառնալիք չկա»։
Փաշինյանի հայտարարությունից հետո Արցախի ժողովրդի նկատմամբ Ադրբեջանի լայնածավալ ռազմական ագրեսիայի հարցով հրավիրված ՄԱԿ-ի Անվտանգության խորհրդի հրատապ նիստի ժամանակ Ադրբեջանի ԱԳ նախարար Բայրամովը հայտարարել էր․ «Ինձ մնում է միայն խորհրդի ուշադրությունը հրավիրել այն փաստին, որ ընդամենը մի քանի ժամ առաջ Հայաստանի վարչապետն իր հայտարարության մեջ հերքեց բոլոր այս մեղադրանքները՝ հրապարակավ ընդունելով, որ Ղարաբաղում քաղաքացիական անձանց համար չկա ուղղակի սպառնալիք, և որ նրանց նկատմամբ զանգվածային ոճրագործությունների մասին պնդումները ճշմարիտ չեն: Սա, հիշեցնեմ, Հայաստանի վարչապետի հայտարարությունն է, որ արել է մի երկու ժամ առաջ»:
Հարցին, որ այս հայտարարությունը Բաքուն շատ շահարկեց, ՀՀ վարչապետն ու ԱԳ նախարարը միմյանց ելույթներից տեղյա՞կ չեն, հաճա՞խ են իրեն հակադարձում Նիկոլ Փաշինյանի հայտարարություններով, Արարատ Միրզոյանը կարճ պատասխանեց․ «Երբեք»։
«Մանիպուլատիվ հայտարարություններ միշտ կարող են անել, հատկապես մեր ադրբեջանցի հարեւանները հմուտ են, ինչպես տեսնում եք, նաեւ հրապարակավ ձեռք բերված պայմանավորվածությունները մեկնաբանելու հարցումն։ Բայց ըստ էության այն, ինչ նկատի ունեք, ոչ»,- արձագանքեց Միրզոյանը։
Կարդացեք նաև
Ռոզա ՀՈՎՀԱՆՆԻՍՅԱՆ
