«Հայաստանի և Ադրբեջանի միջև երկարատև հակամարտության ընթացքում մարդու իրավունքների էական խախտումներ են եղել»,- Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի լիագումար նիստի ընթացքում հայտարարեց Եվրոպայի խորհրդի մարդու իրավունքների հանձնակատար Դունյա Միյատովիչը։
Նշենք, որ մարդու իրավունքների հանձնակատարի պաշտոնում Դունյա Միյատովիչի վերջին ելույթն էր։ Ելույթում նա հիմնականում անդրադարձավ իր՝ Հայաստան, Ադրբեջան և Լեռնային Ղարաբաղ այցերին, որոնք տեղի էին ունեցել 2023-ի հոկտեմբերին։
Նա հայտարարեց․ «Ցավոք, Ռուսաստանի պատերազմն Ուկրաինայում և Ղրիմի անօրինական բռնակցումը միակ հակամարտությունները չէին, որոնք մարդկային տառապանք պատճառեցին Եվրոպայում։ Մարդու իրավունքների խախտումներ նաև արձանագրվել են Հայաստանի և Ադրբեջանի միջև երկարատև հակամարտության ընթացքում, և, հուսանք, հակամարտության վերջին փուլում Ղարաբաղի տարածաշրջանում և դրա շուրջ»։
Նա հիշեցրեց՝ ընդամենը մի քանի օր առաջ հրապարակել է զեկույց Հայաստան և Ադրբեջան, Ղարաբաղ կատարած այցից հետո․ «Տասնամյակների ընթացքում առաջին անգամն էր, որ նման իրավապաշտպան առաքելությունը կարողացավ այցելել Ղարաբաղի տարածաշրջան: Ես շեշտում եմ, որ ղարաբաղյան տարածաշրջանի շուրջ հակամարտությունից տուժած բոլոր անձանց իրավունքների արդյունավետ պաշտպանությունը խաղաղ գործընթացի հաջողության բանալին է»։
Կարդացեք նաև
ԵԽ մարդու իրավունքների հանձնակատարը նշեց՝ բացի պատերազմական և հակամարտությունների գոտիներում մարդու իրավունքների պաշտպանությունից, դեռևս կան այլ ուշագրավ մարտահրավերներ, որոնք պետք է լուծվեն։
Նա ամենամտահոգիչը համարեց այսպես կոչված «օրենքի գերակայության էրոզիան» և թվարկեց այն խնդիրները, որոնք կարևոր են եվրոպական ժողովրդավարությունների և ԵԽ-ի ապագայի համար։ Մասնավորապես՝ օրենքի գերակայությունը, եվրոպական դատարանի վճիռների կատարումը, ընտրված պաշտոնյաների անկախության ապահովումը և այլն։
Դունյա Միյատովիչի ելույթին հետևեց ԵԽԽՎ պատվիրակների հետ հարցուպատասխանը, որի ընթացքում բավականին ակտիվ էին հատկապես ադրբեջանական պատվիրակության անդամները։
Տաթև ՀԱՐՈՒԹՅՈՒՆՅԱՆ
