Aravot.am-ը Գյումրու պատմական կենտրոնում գտնվող ռեստորաններից մեկի գործադիր տնօրեն Կարեն Հարությունյանից հետաքրքրվեց, թե զբոսաշրջային քաղաքի սպասարկման ոլորտում աշխատելու համար դժվար չէ՞ արդյոք համապատասխան կադրեր գտնելը, հատկապես որ շատ ռեստորանատերեր ու հյուրանոցատերեր դժգոհում են, թե ավանդական այս քաղաքի մենթալիտետը չի թույլատրում, որ մարդիկ ասենք՝ մատուցող աշխատեն։
Նշենք նաև, որ Գյումրիում ամենաշատ աշխատանքային առաջարկներն արվում են սպասարկման ոլորտում, որը ինչ-որ տեղ բնական է․ Գյումրիում վերջին տարիներին ավելացել է ռեստորանների, հյուրանոց-հյուրատների քանակը։
Կարեն Հարությունյանն ասաց․ «Հին մենթալիտետը, բնականաբար, կա, կարծում եմ՝ դեռ երկար տարիներ կպահանջվեն, որ այն փոխվի, բայց դրական տենդենց ևս նկատվում է․ աշխատանք փնտրող երիտասարդների մոտ փոփոխություն կա․ երբ առաջ ամոթ էր համարվում սպասարկման ոլորտում աշխատելը, այսօր կարելի է ասել՝ լուրջ են վերաբերում այս ոլորտին ու հասկանում են՝ դա շատ լուրջ մասնագիտություն է։
Վերջին տարիներին բազմաթիվ ներդրումներ են կատարվել մեր քաղաքի սպասարկման ոլորտում, նաև դա է հնարավորություն տվել երիտասարդներին ընդունելու, որ մատուցողի աշխատանքը սպասարկման ոլորտում շատ կարևոր մասնագիտություն է, և յուրաքանչյուր մասնագիտություն պահանջում է պրոֆեսիոնալիզմ, իսկ պրոֆեսիոնալ մատուցողը լուրջ մասնագետ է իր ոլորտում։
Կարդացեք նաև
Ինքս, այս ամենը կարևորելով, կառավարման մեջ հատուկ ուշադրություն եմ դարձնում կադրերի ընտրությանը, քանի որ իմ աշխատանքի հաջողությունը պայմանավորված է արհեստավարժ ու պրոֆեսիոնալ աշխատանքին տիրապետող մատուցողների ընտրությամբ։
Այսօր շատ երիտասարդներ, մատուցող աշխատելով ու հմտանալով իրենց աշխատանքի մեջ՝ կարողանում են բավական լուրջ գումար վաստակել։ Կարելի է ասել՝ կարծրացած մտածողությունը տարիների ընթացքում սկսում է փոխվել՝ երևի հենց զբոսաշրջիկների այցերով պայմանավորված․ շատերին է հետաքրքիր, ուզում են փորձել իրենց ուժերը»։
Նշենք նաև, որ վերջին շրջանում հանրապետության տարբեր տեղանքներից ևս տեղափոխվում են Գյումրի՝ սպասարկման օբյեկտներում աշխատելու համար։
Նունե ԱՐԵՎՇԱՏՅԱՆ
