Aravot.am-ի տեղեկություններով՝ Արցախի Հանրապետության քաղաքաշինության նախկին նախարար Ազատ Համբարձումյանն իրավապահներին օրեր առաջ հաղորդում է տվել, որ 2020թ. հուլիսի 20-ին «Տարմա» ընկերության տնօրեն Տ. Օ-ի եւ ԱՀ քաղաքաշինության նախարարության միջև կնքվել է պետության կարիքների համար ապրանքների պետական գնման 3 պայմանագիր, համաձայն որոնց՝ նշված ՍՊԸ-ն պարտավորվել է պայմանագրերում նշված ժամկետներում պատվիրատուին Ստեփանակերտ քաղաքում մատակարարել 4 բնակելի արագ հավաքվող տների համար նախատեսված մետաղական կոնստրուկցիաներ, որի դիմաց ընկերությանը 09.12.2022-31.01.2023թթ. ընկած ժամանակահատվածում 5 բանկային փոխանցումների միջոցով մաս-մաս փոխանցվել է ընդհանուր՝ շուրջ 50.724.000 ՀՀ դրամ։
Ստանալուց հետո, որոշ ժամանակ անց, մատակարար ընկերությունը բանավոր կարգով հայտնել է, որ շրջափակման պայմաններում պայմանագրի առարկա հանդիսացող արագ հավաքովի կոնստրուկցիաները տեղափոխվել է Ստեփանակերտ քաղաք, սակայն փաստացի հանձնում-ընդունում չի իրականացվել և հիշյալ ապրանքները չեն մատակարարվել: Նման պայմաններում «Տարմա» ՍՊԸ-ն ներկայումս հրաժարվում է մատակարարել պայմանագրի առարկա հանդիսացող արագ հավաքովի կոնստրուկցիաները կամ վերադարձնել դրան համարժեք գումարը։ Այդ կերպ նշված ընկերության տնօրենի կողմից հափշտակվել է նրան վստահված իրավաբանորեն նրա տնօրինմանն ազատ կամքով հանձնված առանձնապես խոշոր չափերով 50.724.000 ՀՀ դրամ:
Ազատ Համբարձումյանի լուսանկարը՝ ԱՀ Քաղաքաշինության Նախարարության ֆեյսբուքյան էջից
Քաղաքաշինության նախկին նախարար Համբարձումյանը Aravot.am-ի հետ զրույցում ասաց, որ չի կարող մեզ այդ մասին ոչինչ հայտնել:
Մեր տեղեկություններով՝ դեռեւս քրեական վարույթ չկա այս դեպքով նախաձեռնված, քանի որ Հայաստանում նման դեպքի քննության առումով, հնարավոր է խնդիրներ առաջանան, թե ինչ հիմքով են քննելու մի տարածքում կատարված դեպք, որը դե յուրե Հայաստան չէ:
