Գործադիրն այսօր հավանություն տվեց ՀՀ-ի եւ Ասիական զարգացման բանկի միջեւ 2023թ. նոյեմբերի 27-ին կնքված (լուսանկարում) «Երեւանի քաղաքային զարգացման ներդրումային ծրագիր» վարկային համաձայնագիրը վավերացնելու մասին նախագծին։
Համաձայնագրով նախատեսված գումարը կազմում է 60,090,000 եվրոյի չափով վարկ։
Ըստ որոշման նախագծի՝ այս վարկային համաձայնագրով կառուցվելու է Իսակով-Արշակունյաց ճանապարհահատվածը, որը միմյանց կկապի Երեւան քաղաքի մի քանի վարչական շրջաններ՝ իր վրա վերցնելով տրանսպորտային մեծ հոսքեր՝ նվազեցնելով խցանումները: Իսակով-Արշակունյաց ճանապարհահատվածը հանդիսանում է Մոնթե Մելքոնյան փողոցի տրամաբանական շարունակությունը:
Նախատեսված աշխատանքները ներառում են՝
Կարդացեք նաև
· Իսակով պողոտայի վրա առկա ճանապարհային հանգույցի անհրաժեշտ թեւերի կառուցում, որն ապահովվելու է մուտք դեպի Նորագյուղ թաղամաս,
· Հրազդան գետի վրա կառուցվելու է 269 մ երկարությամբ երկաթբետոնե հեծաններով կամուրջ,
· Արշակունյաց պողոտայում կառուցվելու է թունելային անցմամբ եւ շրջանաձեւ երթեւեկությամբ ճանապարհային հանգույց:
Նախագծում նշված է, որ հիմնական ճանապարհի երկարությունը 1,9 կմ է (իջատեղերով և երկրորդային ճանապարհով՝ 6,6 կմ): Ճանապարհը հիմնականում բաղկացած է 6 երթեւեկելի գոտուց (3×3), որտեղ ճանապարհի երթեւեկելի հատվածի լայնությունը կազմում է 24,5 մ:
60,090,000 եվրոյի չափով վարկը, ըստ որոշման նախագծի, կարող է ժամանակ առ ժամանակ փոխարկվել արժույթի փոխարկման միջոցով՝ համաձայնագրի դրույթներին համապատասխան:
Կառավարությունն ակնկալում է, որ համաձայնագրով նախատեսված ծրագիրը կավարտվի 2027թ. սեպտեմբերի 30-ին, ծրագիրն իրականացնելու է Երեւանի քաղաքապետարանը։
Ըստ համաձայնագրի՝ վարկի փակման ամսաթիվ է համարվում 2028 թվականի մարտի 31-ը կամ այն ամսաթիվը, որը ժամանակ առ ժամանակ կարող է համաձայնեցվել վարկառուի եւ ԱԶԲ-ի միջեւ:
Երեւանի քաղաքապետ Տիգրան Ավինյանն այսօրվա նիստում ասաց, որ այս ճանապարհի կառուցումը բավականին երկար ժամանակ քննարկված ու բոլոր տեսակի ուսումնասիրություններն անցած նախագիծ է, որը էականորեն կբեռնաթափի երթեւեկությունը, Մոնթե Մելքոնյան փողոցը ուղիղ կկապվի Արշակունյաց պողոտայի հետ։
Մանրամասն՝ տեսանյութում
Նելլի ԲԱԲԱՅԱՆ
