Երեկ մամուլի ասուլիսում ՀՀ ՆԳ նախարար Վահե Ղազարյանը հայտարարեց, որ մտադիր է հանդիպել 2021 թվականի սեպտեմբերի 21-ին Եռաբլուրում «կարմիր բերետավորների» գործողություններից տուժած որդեկորույս ծնողների հետ: Նա ասաց՝ «ցավում է» տեղի ունեցածի կապակցությամբ՝ հիշելով՝ քանիցս ասել է, հիմա էլ հաստատում է՝ հնարավորության դեպքում կցանկանար հանդիպել զոհվածների հարազատների հետ, որոնք եղել են Եռաբլուրում, երբ տեղի է ունեցել միջադեպը:
Հիշեցնենք, Եռաբլուր զինվորական պանթեոնից զոհված զինծառայողների 34 ծնող էր բերման ենթարկվել 2021 թվականի սեպտեմբերի 21-ին: Ըստ գործի նյութերի, 439 ոստիկան է եղել դեպքի վայրում, բայց որեւէ ոստիկանի նկատմամբ քրեական վարույթ չի իրականացվի: Հիշեցնենք նաեւ, որ այդ օրը զոհված զինծառայողների ծնողները փակել էին պանթեոնի մուտքը՝ թույլ չտալու Նիկոլ Փաշինյանի մուտքը Եռաբլուր, քանի որ նա պարտության էր տարել պատերազմում հայկական կողմին: Ծնողները բերման էին ենթարկվել բիրտ ուժի կիրառմամբ:
Թե ինչո՞ւ 2021 թվականի սեպտեմբերի 21-ից ցայսօր այդ հնարավորությունը չի ստեղծվել, Վահե Ղազարյանը չասաց:
Հիշեցնենք, որ այդ միջադեպին հաջորդած զարգացումների ընթացքում, միջադեպի մասնակից ծնողները մի շարք ցույցեր են կազմակերպել՝ պահանջելով պատշաճ վերաբերմունք եւ պատկան մարմիններից կոռեկտ աշխատանք:
Կարդացեք նաև
«Որդիների կանչ» հասարակական կազմակերպության համակարգող խորհրդի անդամներից Արա Ռոստոմյանից (լուսանկարում) Aravot.am-ը հետաքրքրվեց՝ Վահե Ղազարյանից հանդիպման հրավեր ծնողները ստացե՞լ են, եթե՝ այո՝ ինչո՞ւ չեն ընդունել հրավերը: Կամ, եթե առաջիկայում նման հրավեր լինի՝ կընդունե՞ն:
Արա Ռոստոմյանի դիտարկմամբ՝ Վահե Ղազարյանը հերթական պոպուլիստական հայտարարությունն արեց. «Այսինքն՝ առաջիկայում հանձնարարել եմ, հնարավորության դեպքում… թող առաջարկ անեն՝ հետո կհասկանանք: Այսպես, օդի մեջ՝ եթե անեն… Թող լինի պաշտոնական առաջարկ՝ կքննարկենք: Մենք միավոր ենք՝ միասին էլ որոշում կկայացնենք՝ հիմնավորումներով»:
Մեր զրուցակցի դիտարկմամբ, այդ միջադեպից հետո ոստիկանությունն իրեն չի պահել այնպես, որ երեւար՝ ցավում են, ինչպես Վահե Ղազարյանն էր ասում:
Նելլի ԳՐԻԳՈՐՅԱՆ
