Aravot.am-ը տեղեկություններ ուներ, որ Հայաստանի պետական տնտեսագիտական համալսարանում (ՀՊՏՀ) որոշել են Կառավարման խորհրդի նիստը կազմակերպել առցանց, որպեսզի ՀՀ նախագահ, ՀՊՏՀ խորհրդի նախագահ Վահագն Խաչատուրյանի հետ լրագրողները հնարավորություն չունենան հանդիպելու եւ ռեկտորի՝ ԱՄՆ-ում կատարած գողության հետ կապված սկանդալի մասին հարցեր ուղղելու:
Aravot.am-ը համալսարանից հետաքրքրվեց՝ արդյոք նիստը պատրաստվում են առցանց իրականացնել:
ՀՊՏՀ մարքեթինգի և հասարակայնության հետ կապերի բաժնից մեզ գրավոր հետևյալը փոխանցեցին, որ այն արդեն կայացել է:
«Հայաստանի պետական տնտեսագիտական համալսարան» ՊՈԱԿ-ի Խորհրդի աշխատակարգի 17-րդ կետի համաձայն՝ Խորհրդի նիստերը կարող են կազմակերպվել նաև հարցման կարգով և առցանց եղանակով՝ բացառությամբ փակ գաղտնի քվեարկություն պահանջող հարցերի։ Հաշվի առնելով, որ ՀՀ նախագահ, ՀՊՏՀ խորհրդի նախագահ Վահագն Խաչատուրյանը բացակայում է երկրից, իսկ քննարկվող հարցերը հրատապ են, նիստն անցկացվել է վերոնշյալ կետի դրույթներին համապատասխան՝ 16․01․2024-ին»,-հայտնեցին ՀՊՏՀ-ից:
Կարդացեք նաև
Հիշեցնենք, որ հունվարի 12-ին ժամը 14-ին նշանակված ՀՊՏՀ կառավարման խորհրդի նիստը սկսվելուց քիչ առաջ առանց պատճառաբանության հանվեց, եւ նիստի մասին որեւէ տեղեկատվություն չէր զետեղվել բուհի կայքում: Այս անգամ եւս կայքում որեւէ տեղեկատվություն չկար:
Գոհար ՀԱԿՈԲՅԱՆ
