«Պարոն Մանուկյան, ասում եք՝ Հայաստանում երկու կատեգորիայի մարդ է լինելու, մարդիկ, որոնք կարող են տալ 2,5 մլն դրամ եւ ազատվել բանակից, եւ մարդիկ, որոնք պետք է գնան ծառայության։ Ես որքան գիտեմ՝ դուք լուսնից չեք իջել ու վերջին 30 տարում Հայաստանում եք ապրել։ Դուք չգիտե՞ք, որ Հայաստանում շատ արատավոր երեւույթներ են եղել եւ այդ երեւույթների արդյունքում լիքը մարդիկ չեն ծառայել տարբեր պատճառներով, այդ թվում՝ ձեր ասած գումարը տալով։ Ես խնդրում եմ, գոնե դուք, գոնե այս հատվածում նստած մարդիկ դրա մասին չխոսեն»,- Ազգային ժողովում «Զինվորական ծառայության եւ զինծառայողի կարգավիճակի մասին» օրենքում լրացումներ եւ փոփոխություններ եւ Քրեական օրենսգրքում լրացում կատարելու մասին օրենքների նախագծերի փաթեթի քննարկման ժամանակ «Հայաստան» խմբակցության պատգամավոր Գեղամ Մանուկյանին դիմեց ՔՊ խմբակցության պատգամավոր Գեւորգ Պապոյանը։
Նշենք, որ Գեղամ Մանուկյանը, անդրադառնալով այս նախագծին, ասել էր․ «Հայաստանի Հանրապետությունում ուզում են հաստատել երկու կատեգորիայի քաղաքացի՝ մեկը 2,5 միլիոնով քաղաքացիություն ստանալով՝ բանակից ազատվում է, մեկը՝ պարտավոր է գնալ ծառայության»։
Պապոյանը նշեց, որ լավ օրից չէ, որ այսպիսի նախագիծ է մշակվել։ «Կա իրավիճակ, որ այս մարդիկ կամ չեն գալու Հայաստան այլեւս, կամ պիտի տասնյակ տարիներ սպասեն, կամ հնարավորություն են ունենալու վճարել գումար, այդ գումարով մենք կարող ենք, օրինակ, պայմանագրային զինծառայողների աշխատավարձը բարձրացնել կամ պայմանագրային զինծառայողներ ընդգրկել ծառայության մեջ եւ մեր սահմանների պաշտպանունակությունը բարձրացնել։ Ինձ հետաքրքիր է մեր գործընկերների տեսակետը, կարծես վերջին մի քանի տարին, որ եկել են Ազգային ժողով, մոռացել են՝ ինչ է տեղի ունեցել Հայաստանում, եւ այդպիսի դասակարգում են անում։ Ցավոք սրտի, այդպիսի դասակարգում եղել է, եւ այդ դասակարգումը եղել է այն ժամանակ, երբ դուք եղել եք իշխանության, հարգելի գործընկերներ»,- ասաց Պապոյանը։
ՔՊ խմբակցության պատգամավոր Վահագն Ալեքսանյանն էլ իր ելույթում ասաց․ «Եկեք ի սկզբանե ֆիքսենք՝ ինչի՞ մասին են խոսում։ Խոսում ենք այն մասին, որ մարդիկ ապօրինի խուսափել են զորակոչից, չեն ծառայել բանակում, օրենք են խախտել, փախել են զորակոչից։ Այդ նույն կարգավորումները, որ ինչ-որ բանի դիմաց կարելի է տուգանք վճարել, մեր քրեական, վարչական, բոլոր օրենսգրքերում էլ կան։ Ձեր կարգավորումներով հետեւյալն էր իրավիճակը՝ եթե մինչեւ զինապարտության հաշվառման կանգնելը մեկը քաղաքացիությունից հրաժարվում էր, գնում էր, ուրիշ երկրի քաղաքացի էր դառնում, հետո 27 տարին լրանում էր, էլի գալիս էր Հայաստանի քաղաքացի էր դառնում, ոչ մի բան, բարի գալուստ Հայաստան, հարգելի ընկեր։ Հիմա այս վերջին կարգավորումն այն մասին է, որ նման մանիպուլյացիաներ չլինեն»։
Կարդացեք նաև
Ռոզա ՀՈՎՀԱՆՆԻՍՅԱՆ
