Նկարչուհի Ալ Անանյանը 2023 թվականը ամփոփելով՝ ստեղծագործական առումով արդյունավետ է համարում ու կարեւորում է հատկապես իր «Աղոթք» խորագրով ցուցահանդեսը, որ կայացել էր «Փյունիկ» զարգացման կենտրոնում: Հեղինակը «Աղոթք» խորագիրն էր ընտրել ջութակահար հղի կնոջը պատկերող նկարի ազդեցությամբ, որը պատերազմի ժամանակ կորցրել էր ամուսնուն, եւ ջութակ նվագելիս վերհիշում էր իրենց սերը, իսկ նկարի վերեւում վեր պարզած ձեռքերը աղոթք էին խորհրդանշում՝ առ Աստված։
Տարվա վերջին՝ դեկտեմբերի էլ Ալ Անանյանը մասնակցել է «Հայացք ապագային» խորագրով խմբակային ցուցահանդեսին։ Ասում է, թեեւ ցուցահանդեսը խմբակային էր, սակայն աշխատանքներով շեշտվում էր նկարիչների անհատականությունը։
Ալ Անանյանը մասնակցել է բազմաթիվ խմբակային ցուցահանդեսների, ունեցել 10 անհատական ցուցահանդես։ 10-րդը հենց «Աղոթքն» է, որը հեղինակի համար առանձնահատուկ նշանակություն ունի: Նա ստեղծագործում է առանց ակնկալիքների, որովհետեւ առաջնորդողը մուսան է, սակայն հավելում է, որ մեդալներից ու պատվոգրերից ոգեւորվում է, որովհետեւ դրանք փաստում են՝ արվեստագետի գնահատված լինելը:
Գոհար ՀԱԿՈԲՅԱՆ
«Առավոտ» օրաթերթ
13.01.2024
