«Ես ԿԳՄՍ նախարարությունում հանձնաժողովին եւ փոխնախարարին իրազեկեցի դատարանների որոշումների մասին: Անակնկալ կերպով ինձ ներկայացվեց նորանշանակ պաշտոնակատար Կարեն Սիմոնյանի կողմից ստորագրված եւ կնքված մի փաստաթուղթ, որով «Գոյ» թատրոնը հրաժարվում է որպես փաստաբան իմ ծառայությունների եւ օրինական ներկայացուցիչ լինելու գործընթացից: Մենք սրա վերաբերյալ եւս դատական ատյաններում կփորձենք իրավունքի պաշտպանություն ներկայացնել»,-լրագրողների հետ զրույցում ասաց «Գոյ» թատրոնի փաստաբան Կարո Ասատրյանը՝ դուրս գալով ԿԳՄՍ նախարարությունից, որի շենքի մոտ ցույց էր անում «Գոյ» թատրոնի անձնակազմը:
Փաստաբանի խոսքով, այն անձը (թատրոնի նախկին տնօրենը-Գ.Հ.), ով իրեն տվել է լիազորություններ, անհիմն, ապօրինի կերպով ազատվել է աշխատանքից. «Եվ հիմա եկել՝ նշանակվել է մի աշխատակից, որը չի գործում «Գոյ» թատրոնի շահերից: Փաստացի նախարարության գործողությունները շարունակելու նպատակով իրավական ժամանակավոր մեխանիզմ են գտել, որով իմ ձեռքերը կապում են: Ուզում եմ ասել, որ հենց նոր, քիչ առաջ տեղեկացա, որ որպես փաստաբան իմ լիազորությունները դադարեցվել են: Կարելի է արձանագրել, որ սա առնվազն ազնիվ չէ…»:
Փաստաբանը նշեց, որ իրավաչափությունը կվիճարկվի դատարանում: Նաեւ արձանագրեց, որ նորանշանակ տնօրենը ուղիղ կատարում է ԿԳՄՍ նախարարության հրահանգները՝ առանց թատրոնի շահերը հաշվի առնելու:
Կարդացեք նաև
Գոհար ՀԱԿՈԲՅԱՆ
