Այսօր ԱԺ-ում ՊԵԿ նախագահ Ռուստամ Բադասյանը ներկայացրեց «Պետական տուրքի մասին» օրենքում փոփոխությունների նախագիծը, որով Գյումրիի մաքսատան ծանրաբեռնվածությունն են ուզում թուլացնել՝ տուրքերի բարձրացման միջոցով: Մաքսատանը ներկրված մեքենան պահելու համար օրական 1600 դրամի փոխարեն կգանձվի 5000 դրամ, այն էլ ժամանակավոր պահպանության 2-րդ օրվանից սկսած: Առաջին օրվա համար պետական տուրք չի գանձվի՝ դրանով խրախուսելով ավտոմեքենաների մաքսազերծումը մեկօրյա ժամկետում իրականացնելը:
ՔՊ պատգամավոր Գեւորգ Պապոյանն ասաց, որ սրա նպատակն է մեր երկրի մաքսատունը չվերածել ավտոկայանատեղիի:
«Հայաստան» խմբակցության պատգամավոր Գառնիկ Դանիելյանն ասաց, որ տարիներ շարունակ այս ոլորտը միլիարդների մուտք է ապահովել բյուջե, բայց այսօր անզեն աչքով երեւում է, որ այս ոլորտում աշխատող մարդիկ իրենց կապիտալը դուրս են հանում: Գնում են այն երկրներ, որտեղ ավելի լավ պայմաններ են առաջարկում. «Մենք պիտի հարեւան պետության հաջողված փորձը վերցնենք, Վրաստանը ավելի գրավիչ պայման է առաջարկում: Կարող է մեքենան մի քանի շաբաթ չէ մի քանի ամիս էլ մնա, եթե դա լրացուցիչ գումար է ապահովելու, որ մտնի բյուջե, մարդիկ գալիս են` գումարներ են բերում իրենց հետ, այդ հարցերը պետք է լուծում ստանան»:
Կարդացեք նաև
Բադասյանը պատասխանեց, որ ՊԵԿ-ը ոչինչ չի արել՝ ոլորտը վնասելու համար. «Անցյալ տարվա օգոստոսի 1-ից ուտիլիզացիոն վճարումների կարգավորում է ուժի մեջ մտել ՌԴ-ում եւ նաեւ որոշակի լոգիստիկ խնդիրներ են առաջացել աշխարհաքաղաքական իրավիճակով պայմանավորված, որի արդյունքում ոլորտը ծանր դրության մեջ է հայտնվել: ՊԵԿ-ը որեւէ գործողություն չի արել, մենք, իհարկե, արել ենք մեր պարտականությունը այս ոլորտում տեղ գտած խիստ չարաշահումների դեմն առնելու համար»:
Հռիփսիմե ՋԵԲԵՋՅԱՆ
