Սոցցանցերում հրապարակային բանավեճ է ծավալվել Երեւանի քաղաքապետարանի հերթական շվայտ գնումների հետ կապված: Երեւանի ավագանու անդամ Գրիգոր Երիցյանը կիսվել է Հանրապետության հրապարակից մի լուսանկարով ու գրել. «Հանրապետության հրապարակի շատրվանների 3 անճոռնի ջահերի ձևավորման համար միայն հարկատուների գրպանից քաղաքապետարանը հատկացրել է 79 միլիոն դրամ։ Դեռ զարմանո՞ւմ եք, որ ցնցուղը 72 հազար դրամ արժեր»:
Երեւանի փոխքաղաքապետ Սուրեն Գրիգորյանը հակադարձել է. «Առնվազն անճոռնի և անտրամաբանական է իրականությունը չհասկանալով, և նաև հասկանալու համար փորձ չձեռնարկելով՝ անպատասխանատու հայտարարություններ անելը։ Շատ ավելի տգեղ է ամեն տարի նույն գույքը իբր էժան գնով ձեռքբերելու մասին հայտարարելը, որի նպատակը մանիպուլյատիվ կերպով մարդկանց աչքին փոքր գումարներ ներկայացնելն է, և դա այն դեպքում, երբ համայնքը մեկ անգամ է ծավալային գնում իրականացրել՝ բազմաթիվ տարիներ օգտագործման համար: Մեր այս գաղափարը «Անճոռնիություն» անվանելն է անճոռնիություն։ Անճոռնի է արդեն տարիների փորձառություն ունեցող ավագանու անդամ լինելով, պայմանագրերի բովանդակությանը ծանոթանալու փոխարեն դեղին մամուլի մակարդակից էլ ցածր վերնագիր տեղադրելը»: Նա կիսվել է Երեւանի քաղաքապետի մամուլի քարտուղար Հայկ Կոստանյանի բացատրությամբ, որտեղ գրված է նույնը, ինչ Երիցյանն է վերաշարադրել. «Տարբեր էլեմենտներով փորձել ենք ստանալ մի ընդհանուր պատկեր, որտեղ ներգրավված են բյուրեղապակյա հսկա լուսամփոփներ, որոնց հավաքման համար օգտագործվել է ընդհանուր 440.000 բյուրեղիկ, ռոյալներ և նրանցից ճյուղավորվող նոտաներ՝ խաչատրյանական տարբեր ստեղծագործություններից հատվածներով։ Ձեռք բերված դեկորացիաները օգտագործվելու են նաև հաջորդ տարիներին։ Վերը թվարկվածների ընդհանուր պայմանագրային արժեքը կազմում է 79 մլն. դրամ»:
Երեւանի նախկին քաղաքապետի խոսնակ Հակոբ Կարապետյանը նույնպես միացել է բանավեճին՝ նշելով. «Այդ լամպերը կարող են որակվել անճոռնի, անհարկի, տգեղ, նույնիսկ կարող են լինել այնպիսի մարդիկ, որ կասեն՝ բարոյական թերմացք պետք է լինել պետության գոյության թերեւս ամենաողբերգական տարում նման ճոխություններ թույլ տալը տոնական զվարճանքների վրա։ Սրանք կարծիքներ են, որոնք կարող են ձեզ դուր գալ կամ դուր չգալ, բայց դրանք լռեցնել չեք կարող, ոչ դուք անձամբ, ոչ ձեր թիմակիցները։ Իսկ «դեղին մամուլի» մասին դատողություն անելիս ազնիվ կլիներ հետ հայացք գցել ու հիշել, թե նախընտրական շրջանում ինչպիսի ապատեղեկատվական արշավ էիք նախաձեռնել ձեր քաղաքական հակառակորդների դեմ դուք եւ ձեր թիմակիցները՝ սիստեմատիկորեն կիսվելով ֆեյք տեղեկատվություն արտաթորող էջերի գրառումներով»:
Օգտատերերը տարբեր հարցադրումներ են առաջ բերել՝ որքանո՞վ է նորմալ 79 միլին դրամ հատկացնել 3 ջահի համար, եղե՞լ է մրցութային ծրագիր, ինչ սկզբունքո՞վ է ընտրվել հաղթողը, ո՞վ 3 ջահ տեղադրել՝ 192 հազար դոլարով:
Կարդացեք նաև
Ի պատասխան՝ Սուրեն Գրիգորյանը հորդորել է ծանոթանալ պայմանագրին ու նշել, որ ընտրության ընթացակարգը մրցութային չի եղել:
Հռիփսիմե ՋԵԲԵՋՅԱՆ
