«Թաքցնելու շատ բան չկա, Ալիեւն ասել է՝ ինչ կա»,- այսօր «Այլընտրանքային նախագծեր» խմբի կազմակերպած «Հայկական օրակարգ» ծրագրի՝ «Խոսքից՝ գործ. ի՞նչ է սպասվում առաջիկայում եւ ի՞նչ անել» թեմայով քննարկման ժամանակ կարծիք հայտնեց ԱԺ «Հայաստան» խմբակցության պատգամավոր Քրիստինե Վարդանյանը՝ անդրադառնալով Ադրբեջանի եւ Հայաստանի միջեւ նախապատրաստվող խաղաղության պայմանագրի դրույթներին:
Հիշեցնենք, օրեր առաջ, ընդդիմադիր պատգամավորները հայտարարեցին, որ ԱԳՆ-ում ծանոթացել են պայմանագրի դրույթներին եւ դրանք Հայաստանի համար անընդունելի են համարում: Իսկ Ադրբեջանի նախագահ Իլհամ Ալիեւն ադրբեջանական լրատվամիջոցներին օրերս տված հարցազրույցում, բավական ուշագրավ մտքեր էր հնչեցրել:
«Այն, ինչ ասում էինք առանց ծանոթանալու, մեր պնդումները ծանոթանալուց հետո միայն հաստատվել են: Խոսույթը, որ Ալիեւը տապալում է բանակցային գործընթացը, ընդհանրապես իրականության հետ կապ չունի այն առումով, որ Ալիեւի հայտարարությունները նրա մասին են, ինչի շուրջ ընթանում են բանակցությունները»,- ասաց Քրիստինե Վարդանյանը՝ հավելելով, որ նոր բան 2020 թվականի նոյեմբերի 9-ից հետո ընթացող բանակցություններում չկա, բանակցվում է այն ամենը, ինչի մասին Ալիեւը հայտարարեց:
Ըստ նրա, Նիկոլ Փաշինյանը երկու կետի շուրջ է բանակցում, որպեսզի պայմանագրի վերնագրում լինի «խաղաղություն» բառը, որը ինքը կարողանա վաճառել մեր հասարակության վրա ու անհասկանալի է, թե ինչո՞ւ ենք Ադրբեջանի հետ խաղաղության պայմանագիր կնքում, երբ ՀՀ-ն այդ երկրի հետ պատերազմի մեջ չի եղել: Եվ երկրորդը, որպեսզի «Զանգեզուրի միջանցք» ձեւակերպումը չլինի, բայց, այն, ինչը քննարկվում է, հենց այդ միջանցքի տրամաբանությունն է:
Կարդացեք նաև
Պատգամավորի պնդմամբ, Նիկոլ Փաշինյանն Ալիեւի օրակարգերի հետ խնդիր չունի, խնդիր ունի միայն որոշ ձեւակերպումների հետ:
Քրիստինե Վարդանյանի պնդմամբ, բանակցվող փաստաթղթերում չկան երաշխիքներ, որ Ադրբեջանը հրաժարվում է Հայաստանի նկատմամբ իր տարածքային հավակնություններից:
Ի՞նչ նոր իրավիճակում է հայտնվում Հայաստանը, եթե Ադրբեջանի հետ խաղաղության պայմանագիրը ստորագրվի՝ հարցին, Քրիստինե Վարդանյանը պատասխանեց, որ այդպիսով լեգիտիմացնում են Իլհամ Ալիեւի՝ ուժի սպառնալիքի կիրառմամբ հարցերը լուծելու՝ միջազգային իրավունքին հակադրվող քայլերը:
Այլ մանրամասները՝ տեսանյութում
ԱԺ «Պատիվ ունեմ» խմբակցության պատգամավոր Աննա Մկրտչյանի կարծիքով, հայկական ինքնության վերացման քաղաքականություն է վարվում, այլապես ինչպե՞ս բացատրել Հայաստանում հավատարմագրված դիվանագիտական ներկայացուցչությունների եւ մեր երկրում աշխատող դիվանագետների լռությունն այն պարագայում, երբ 2018-ից սկսած բանտում երեք մարդ մահացավ՝ դատավճռի սպասելով, երբ նրանք ակնհայտ քաղաքական դատական գործընթացները չեն նկատում եւ այլն:
Որպեսզի պայքարը դառնա ավելի գրագետ եւ արդյունավետ, Աննա Մկրտչյանի կարծիքով, նախ պետք է սկսենք միգուցե շատ մանր քայլից՝ իրերն իրենց անուններով կոչելուց. օրինակ՝ Նիկոլ Փաշինյանին վարչապետ չանվանելուց, դադարել ասել՝ Հայաստանն Արցախին չօգնեց, որովհետեւ Նիկոլ Փաշինյանը չի օգնել եւ այլն:
«Հայկական նախագծերի» համակարգող Վահե Հովհաննիսյանի դիտարկմամբ էլ՝ թուրքական գործոնը զրո է այն հարցում, որ մենք ունենք շատ կոմֆորմիստներ, խոնարհվողներ եւ դա հայկական իրականության կերտած պատկեր է: Միաժամանակ, մենք ունենք մեծ ռեսուրս, քանի որ մեր հասարակության մի զգալի հատվածը պատրաստ է պայքարել հայկական Արցախի համար: Նրա գնահատմամբ, այս հատվածում ունենք երեք ռեսուրս՝ եկեղեցին, անհատները, Բաքվի եւ Երեւանի բանտերը:
«Վագիֆ Խաչատրյանի դատավարությունը ոչնչով չի տարբերվում Արմեն Աշոտյանի դատավարությունից»,- կարծում է Վահե Հովհաննիսյանը:
Այլ մանրամասները՝ տեսանյութում
Նելլի ԳՐԻԳՈՐՅԱՆ
