Այս տարվա կեսից թղթային դեղատոմսեր այլեւս չեն կիրառվի, նախարարությունն անցնում է էլեկտրոնային դեղատոմսերի համակարգին։ Այս մասին այսօր հրավիրված ասուլիսում հայտարարեց առողջապահության նախարար Անահիտ Ավանեսյանը։
Նրա ներկայացմամբ՝ 2023-ին միայն պետական կենտրոնացված գնումներով դեղերն են անցել էլեկտրոնային դեղատոմսերի․ «Այս տարի գործընթացը կշարունակվի, տարվա ընթացքում ընդհանրապես թղթային դեղատոմսերը շրջանառումից դուրս կգան»։
Ըստ նախարարի՝ քաղաքացու՝ էլեկտրոնային գործիքների հասանելիության խնդիր չկա․ բժիշկը դեղատոմսը դուրս է գրելու էլեկտրոնային ձեւաչափով, դեղատները միացած են համակարգին, քաղաքացին անձը հաստատող փաստաթղթով պետք է մոտենա դեղատուն, դեղատունը հասանելիություն է ստանում էլեկտրոնային դեղատոմսին ու բաց է թողնում դեղը․ «Քաղաքացին հավելյալ գործողությունների կարիք չունի»։
Նախարարն ասաց, որ բոլոր դեղատները միացել են համակարգին, գործարկված են բոլոր մեխանիզմները․ «Հիմա փորձարարական ձեւով դուրս ենք գրում դեղատոմսերը, մի քանի ամսվա ընթացքում ամփոփելով գործընթացն ու վստահ լինելով, որ այն հստակ է աշխատում է՝ տարվա կեսից կանցնենք լրիվ էլեկտրոնային դեղատոմսերի»։
Կարդացեք նաև
Դեղատանը անձը հաստատող փաստաթուղթ ներկայացնելու կարիք կլինի միայն դեղատոմսով դուրս գրվող դեղերի դեպքում։
Նելլի ԲԱԲԱՅԱՆ
