Երեքշաբթի հայտնի դարձավ, որ ԱՄՆ պաշտպանության քարտուղար (նախարար–խմբ.) Լլոյդ Օսթինի մոտ շագանակագեղձի քաղցկեղ է ախտորոշվել:
Հետաքրքրական է, որ քաղցկեղի մասին Օսթինն իմացել է դեռ դեկտեմբերին, սակայն կառավարության կաբինետին, այդ թվում՝ Ջո Բայդենին այդ մասին չի փոխանցել: Նախագահը տեղեկացվել է հունվարի 9-ին:
Տարեսկզբից ի վեր՝ Լլոյդ Օսթինի գլխին մութ ամպեր էին կուտակվում: Օրեր շարունակ նրա մասին որևէ տեղեկատվություն չէր տրամադրվում, և միայն հունվարի 6-ին պարզ դարձավ, որ նա հոսպիտալիզացված է:
Հունվարի 9-ին պաշտոնական հաղորդագրություն տարածվեց, ըստ որի՝ պաշտոնյայի քաղցկեղի ախտորոշումը կատարվել է հիվանդության զարգացման վաղ փուլում: Հայտարարության մեջ նշվում է, որ «դեկտեմբերի 22-ին նվազ ինվազիվ վիրահատական միջամտություն է կատարվել»: Հաջորդ օրը Օսթինը դուրս է գրվել հիվանդանոցից:
Կարդացեք նաև
Սակայն հունվարի 1-ին նա «սրտխառնոցի, որովայնի, ազդրերի և ոտքերի ուժգին ցավի պատճառով տեղափոխվել է հիվանդանոց», որտեղ էլ բժիշկները նրա մոտ միզուղիների բորբոքում են հայտնաբերել: «Նա աստիճանաբար վերականգնվում է: Բորբոքումն անցել է: Մենք ակնկալում ենք լիարժեք ապաքինում, չնայած որ այս պրոցեսը կարող է երկար տևել», շեշտվում է հաղորդագրության մեջ:
Ամերիկյան լրատվամիջոցները գրում են, որ հայտնի չէ, թե ինչու պաշտպանական գերատեսչության առաջնորդը որոշել է իր առողջական վիճակի մանրամասների մասին չպատմել Սպիտակ տան աշխատակազմին: CNN-ը գրում է, որ սա հարցեր է առաջացրել «Բայդենի վարչակազմի ներսում թափանցիկության և հաղորդակցության մասին»:
Երեքշաբթի կայացած ասուլիսում ԱՄՆ ազգային անվտանգության խորհրդի խոսնակ Ջոն Քիրբին կարծիք հայտնեց, որ «ցանկալի չէ, որ նման իրավիճակներն այսքան զարգանան առանց գերագույն գլխավոր հրամանատարի իմացության»:
Պատասխանելով լրագրողի հարցին, թե ինչո՞ւ Օսթինը Բայդենին չի տեղեկացրել իր առողջական բարդությունների մասին՝ Պենտագոնի խոսնակ, գեներալ-մայոր Փեթ Ռայդերն էլ իր հերթին ընդգծել է, որ Լլոյդ Օսթինի շուրջ ստեղծված իրավիճակը «խիստ անձնական էր»: Նա պնդել է, որ «իմանալուն պես տեղեկատվությունը փոխանցվում է հանրությանը»: CNN-ն այս առնչությամբ գրում է, որ Պենտագոնում, հավանաբար, նույնպես չեն իմացել գերատեսչության ղեկավարի՝ քաղցկեղով ախտորոշվելու մասին:
Սպիտակ տնից մի պաշտոնյա, որը Politico-ի հետ զրուցել է գաղտնի մնալու պայմանով, փոխանցել է Բայդենի տեսակետն այս ամենի վերաբերյալ՝ «այսպիսի բան այլևս չպետք է լինի»:
Հոսպիտալիզացման մասին տեղեկության տարածումից հետո, երբ դեռ քաղցկեղի մասին հանրությունը չգիտեր, 70-ամյա Լլոյդ Օսթինն ընդունել է, որ «հանրությանը պետք է ավելի պատշաճ ձևով տեղեկացներ իրավիճակի մասին»:
Չնայած կատարվողին՝ ԱՄՆ ռազմական նախարարի հրաժարականի մասին քննարկում չի ծավալվում ներիշխանական շրջանակներում: Ավելին, Ջոն Քիրբին մամուլին հայտնել է, որ նախագահը «լիովին վստահում է» Օսթինին և մտադրություն չունի ազատել նրան զբաղեցրած պաշտոնից:
Արսեն ԱՅՎԱԶՅԱՆ
