Նախաձեռնությունն ուղղված է պաշտպանելու տնտեսվարողների շահերը: Այս մասին ասել է ՀՀ պետական եկամուտների կոմիտեի նախագահ Ռուստամ Բադասյանը` երկրորդ ընթերցմամբ քննարկման ներկայացնելով «Պետական տուրքի մասին» օրենքում առաջարկվող լրացումները:
Նախաձեռնությունը քննարկվել է Տնտեսական հարցերի մշտական հանձնաժողովի` հունվարի 10-ի նիստում: Այն վարել է հանձնաժողովի նախագահի տեղակալ Բաբկեն Թունյանը:
Գործող օրենսդրությամբ սահմանված են ապրանքների ժամանակավոր պահպանության համար պետական տուրքի դրույքաչափերը: Կառավարությունն առաջարկում է բարձրացնել յուրաքանչյուր մեկ տոննայի համար 1000 դրամի չափով եւ մեկ տոննայից ավելի յուրաքանչյուր մեկ տոննայի համար եւս 300 դրամ սահմանված դրույքաչափերը:
Նշվել է, որ տրանսպորտային միջոցների համար պետական տուրքի դրույքաչափերի բարձրացումը պայմանավորված է ժամանակավոր պահպանության ենթակա ապրանքների պահպանման տարածքների սահմանափակ հնարավորություններով: Մասնավորապես, խոսքը վերաբերում է Գյումրու արտաքին տնտեսական գործունեության կենտրոնի տարածքում գտնվող ժամանակավոր պահպանության վայրին ու այդ տարածքի առավել արդյունավետ օգտագործմանը: «Մենք բարձրացնում ենք տուրքը, որ հարկ վճարողը հասկանա` անհարկի մաքսային հսկողության գոտում պետք չէ թողնել մեքենան, քանզի այն վնաս է պատճառում մեկ այլ հարկ վճարողի»,- ընդգծել է Ռուստամ Բադասյանը:
Կարդացեք նաև
Նախաձեռնությամբ առաջարկվում է ապրանքների ժամանակավոր պահպանության առաջին երեք օրվա համար պետական տուրք չգանձել, գանձումը սկսել չորրորդ օրվանից:
Ռուստամ Բադասյանը պատասխանել է պատգամավորների հարցերին: Նշելով, որ նախաձեռնության նպատակը ոչ թե պետական բյուջե լրացուցիչ եկամուտներ ապահովելն է, այլեւ աշխատանքների պատշաճ կազմակերպումը` զեկուցողը պատրաստակամություն է հայտնել պատգամավորների առաջարկով պետական տուրքի գանձումը սկսել չորրորդ օրվանից:
Զեկուցողի տեղեկացմամբ Գյումրու մաքսատունը կարող է օրական ձեւակերպել եւ բաց թողնել շուրջ 550 տրանսպորտային միջոց, որը բավարար է կառավարելու ավտոմեքենաների հոսքը:
Նախատեսվում է, որ օրենքն ուժի մեջ կմտնի պաշտոնական հրապարակումից վեց ամիս հետո:
Լրամշակված նախագիծը ստացել է դրական եզրակացություն:
ՀՀ Ազգային ժողով
