«ԱՆԻՖ-ում փոփոխություններ կլինեն, որովհետեւ մեր նպատակն է այնպես անել, որ ԱՆԻՖ-ը լինի բյուրեղյա մաքրությամբ եւ թափանցիկությամբ ընկերություն»,-այս մասին այսօր հրավիրված ասուլիսում հայտարարեց էկոնոմիկայի նախարար Վահան Քերոբյանն՝ անդրադառնալով ԱՆԻՖ-ի ղեկավար կազմում օրերս կատարած փոփոխությանը։
Հիշեցնենք, որ էկոնոմիկայի նախարարության նախաձեռնությամբ օրերս ԱՆԻՖ-ում իրականացվել են ղեկավար կազմի, այդ թվում՝ տնօրենների խորհրդի փոփոխություններ։ ԱՆԻՖ-ի տնօրեն Դավիթ Փափազյանի լիազորությունները դադարեցվել են վաղաժամկետ։
Լրագրողի հարցին՝ արդյոք ԱՆԻՖ-ում այս փոփոխությունները կապ ունեն պետական վերահսկողական ծառայության ստուգումների հետ, ինչո՞ւ են Փափազյանի լիազորությունները վաղաժամկետ դադարեցվել, Քերոբյանը պատասխանեց՝ IMF-ը (Արժույթի միջազգային հիմնադրամ, Ն․Բ․) անցած տարի հետազոտություն էր արել ու որոշ խնդիրներ հայտնաբերել հաշվետվողականության թափանցիկության, կորպորատիվ կառավարման մակարդակի վերաբերյալ, որից հետո անցյալ տարի կառավարությունը որոշում ընդունեց, որով ԱՆԻՖ-ի մանդատը փոխվեց։
Քերոբյանի ներկայացմամբ՝ եղել են քննարկումներ ԱՆԻՖ-ի մենեջմենթի հետ կապված, 2022-ի հաշվետվությունների վերաբերյալ քննարկումներ, ու չնայած միջազգային աուդիտորական ընկերությունները աուդիտի մաքուր զեկույց են ներկայացրել, այդուհանդերձ, ըստ նախարարի՝ նախարարությունը համարել է, որ այն ճշգրիտ չի արտացոլում ԱՆԻՖ-ի ֆինանսական արդյունքը․ «Դրա վերաբերյալ դիտողություններն ուղարկել ենք ԱՆԻՖ-ին, որից հետո կոլեգիալ որոշում է կայացվել, որ լինի փոփոխություն ԱՆԻՖ-ի մենեջմենթում, որի արդյունքում տնօրենները փոխվել են»։
Կարդացեք նաև
Արդյոք խոսքն անարդյունավետ կառավարման մասին է, լրագրողի այս ճշտող հարցին ի պատասխան նախարարն ասաց՝ չեմ ուզում հիմա տալ կոնկրետ գնահատական․«Խոստանում եմ, ավելի ուշ կտամ։ Հիմա չունենք ամբողջական տեղեկատվություն։ Շուտով ԱՆԻՖ-ի թափանցիկությունն էլ կբարձրանա։ ԱՆԻՖ-ն իր այսօրվա մանդատով պետք է իր ջանքերը կենտրոնացնի տնտեսապես բարդ ապրանքների արտադրության վրա եւ արտահանման դիվերսիֆիկացման վրա։ Այս երկու գործառույթներն են լինելու մանդատում։ Մինչ այժմ արված ներդրումները կարող են մնալ ԱՆԻՖ-ի պորտֆելում, բայց նոր ներդրումները կլինեն իմ նշած ուղղություններում։ ԱՆԻֆ-ում փոփոխություններ կլինեն, որովհետեւ մեր նպատակն է այնպես անել, որ ԱՆԻՖ-ը լինի բյուրեղյա մաքրությամբ եւ թափանցիկությամբ ընկերություն»։
Նախարարը չպատասխանեց հարցին՝ արդյոք ԱՆԻՖ-ում չարաշահումներ եղե՞լ են, թե՞ ոչ։
Նելլի ԲԱԲԱՅԱՆ
