Էկոնոմիկայի նախարար Վահան Քերոբյանն այսօր հրավիրած ասուլիսում ներկայացնելով մակրոտնտեսական ցուցանիշները, հայտարարեց՝ կառավարության համար շատ կարեւոր է աղքատության մակարդակի կրճատումը։
«2022-ին, երբ մենք ապրում էինք բարձր գնաճի եւ բարձր տնտեսական աճի միջավայրում, մեր միջազգային գործընկերները մեզ զգուշացնում էին, որ բարձր գնաճը կարող է հանգեցնել աղքատության մինչեւ 40% -ի աճի։ Բայց մեր կառավարության կանխարգելող եւ առաջանցիկ միջոցառումների շնորհիվ մենք ոչ միայն թույլ չտվեցինք, որ աղքատության մակարդակն աճի, այլ ապահովեցինք մի փոքր կրճատում՝ 26,5%-ից կրճատվեց մինչեւ 24,8%»,-ասաց նախարարը։
Ըստ նրա՝ 2023-ին գրանցվել է բարձր տնտեսական աճ, բայց ցածր գնաճ, ինչը կառավարությանը թույլ է տալիս կանխատեսել, որ 2023-ին էլ աղքատության էական կրճատում կգրանցվի։
Նշենք, որ Վիճակագրական կոմիտեն դեռ չի հրապարակել 2023-ի ցուցանիշները։
Կարդացեք նաև
Քերոբյանի խոսքով՝ մեր երկրում գործազրկության մակարդակը 2023-ի երկրորդ կիսամյակի ցուցանիշների համաձայն 11,7% է․ «Վերջին երեք տարիներին գործազրկության մակարդակը նվազում է, 2020-ին 18,2% է կազմել։ Կանխատեսում ենք, որ այս ցուցանիշն էլ ավելի կիջնի»։
Նելլի ԲԱԲԱՅԱՆ
