«Ազատություն» ռ/կ. Արցախի թեմի առաջնորդ Վրթանես եպիսկոպոս Աբրահամյանի ձեռամբ Էջմիածնի Սուրբ Գայանե եկեղեցում մատուցվեց ճրագալույցի պատարագ, որին մասնակցեցին Արցախի նախագահ Սամվել Շահրամանյանը, Ամենայն Հայոց կաթողիկոս Գարեգին երկրորդը, Արցախի օրենսդիր ու գործադրի մարմինների տարբեր պաշտոնյաներ:
Պատարագին ներկա էին նաև հարյուրավոր քաղաքացիներ՝ հիմնական մասը արցախցիներ:
Մինչ պատարագը Սամվել Շահրամանյանը հրաժարվեց պատասխանել Արցախի կարգավիճակի, արցախցիների հետագա վերադարձի հետ կապված «Ազատության» հարցերին:
Պատարագին մասնակցող արցախցի պաշտոնյաները նույնպես խուսափեցին հարցազրույցից: Իսկ Արցախից տեղահանվածները նշում էին, թե այնտեղ կվերադառնան միայն այն դեպքում, եթե Արցախն այլևս չլինի Ադրբեջանի վերահսկողության տակ:
Կարդացեք նաև
Հարցերի չպատասխանեց նաև Վեհափառ հայրապետը: Ամենայն Հայոց կաթողիկոսն անպատասխան թողեց իշխանության հետ լարված հարաբերությունների մասին հարցերը:
Առաքելական եկեղեցու և իշխանության հարաբերությունները լարվեցին 44-օրյա պատերազմից հետո, երբ կաթողիկոսը հորդորեց վարչապետ Փաշինյանին հրաժարական տալ։ Դրանից հետո որոշ բարձրաստիճան հոգևորականներ սկսեցին մասնակցել նույնը պահանջող ընդդիմության ցույցերին։
Կաթողիկոսն ու վարչապետը մի քանի տարի է համատեղ միջոցառումների չեն մասնակցում, մինչդեռ, օրինակ, 2019-ի դեկտեմբերի 30-ին միասին մարտական դիրքեր էին այցելել։
