«Պլանային նորոգումներ այս սեզոնին չեն արվում, իսկ վթարի դեպքում իրենք պարտավոր են հայտարարել: Վթարի վերացման նվազագույն ժամկետներ կան: Եթե նվազագույն ժամկետը խախտվում է, ավտոմատ կերպով այն բնակիչները, որոնց ջուրը չի վերականգնվել, հաջորդ ամիս իրենց հաշիվներին ստանում են տուգանքներ քաղաքացու օգտին:
Այսինքն՝ ձեր հաշիվների մեջ դուք տեսնում եք, որ որպես կանխավճար ձեզ տուգանք է վճարվել՝ առավելագույնը 2500 դրամ»,- այսօր կառավարության նիստից հետո՝ լրագրողների հետ զրույցում ասաց ՀԾԿՀ նախագահ Գարեգին Բաղրամյանն՝ պատասխանելով լրագրողների հարցերին այն մասին, որ հունվարի 2-ին Երեւանի տարբեր հատվածներում բնակիչները ջուր չեն ունեցել:
Գարեգին Բաղրամյանը նաեւ հավելեց, որ այս դեպքում ընկերությունը կարող է տուգանքի ենթարկվել՝ ՀՀ հանրային ծառայությունները կարգավորող հանձնաժողովի կողմից. «Եթե հայտնաբերեցինք, որ ընկերությունը սահմանված ժամկետից ուշ է միացրել ծառայությունը, և տուգանքները չի վճարել բաժանորդներին, ապա ընկերությունը տուգանքի է ենթարկվում և պարտավորվում է վերացնել խախտումը»:
Կարդացեք նաև
Պաշտոնյան նաեւ տեղեկացրեց, որ համակարգն ինքնաշխատ է, ջրանջատման առավելագույն ժամաքանակը 24 ժամն է. ՀԷՑ-ի պարագայում Երեւանում առավելագույնը 4 ժամն է, մարզերում՝ 6 ժամը:
Այլ մանրամասները՝ տեսանյութում
Նելլի ԳՐԻԳՈՐՅԱՆ
