«Երկու ուղղությամբ դիտարկենք խնդիրը: Առաջինն այն է, որ այս իշխանությունները հերթով խախտում են այն ավանդույթները, որոնց վրա կանգնած է մեր ժողովուրդը, «կոտրում» են բոլոր ոտքերը: Վեհափառի ուղերձը չհեռարձակելը եւս այդ շարքից էր»,- Aravot.am-ի հետ զրույցում անդրադառնալով Ամենայն Հայոց կաթողիկոսի ամանորյա ուղերձը՝ Հ1-ով եթեր չհեռարձակելու որոշմանը՝ ասաց ռեժիսոր Հովհաննես Գալստյանը:
«Մենք հարվածներն անընդհատ տեսնում ենք այդ ինստիտուտի ուղղությամբ: Անկեղծ ասած, ես տարբեր մեկնաբանություններ եմ լսել, թե ինչ է եղել: Սակայն, դրանք բոլորն էլ հետաքրքիր չեն: Փաստն ինքնին սարսափելի է, այդպիսի բան չէր անի անգամ թշնամին: Թշնամին չէր արգելի Վեհափառի խոսքը՝ ուղղված հայ ժողովրդին:
Երկրորդ՝ արգելեցին Վեհափառի, որովհետեւ վախենում են Վեհափառի խոսքից: Վտանգ են տեսնում Վեհափառի խոսքի մեջ: Վեհափառը հետ չի կանգնում իր դիրքորոշումից, անընդհատ կրկնում է, որ այն ինչ կատարվել է մեր հայրենակիցների հետ, պետք է շտկվի, մեր հայրենակիցները պետք է վերադառնանն իրենց բնօրրան: Դա խանգարում է ընդհանուր գծին, բայց դա անբեկանելի է: Ես շատ վատ եմ նայում նրան, որ Ամենայն Հայոց կաթողիկոսի ամանորյա ուղերձը Հ1-ով եթեր չհեռարձակվեց:
Էլի եմ կրկնում՝ մենք ամեն ինչ տեսանք այս ընթացքում, բայց շատ վատ է, որ մի քիչ հանգիստ տարավ մեր հանրությունը դա: Ցավոք, մեր ժողովրդի իմունիտետը հասել է զրոյի: Ես չգիտեմ, թե էլ ինչ պետք է լինի, որ ժողովուրդը ընդվզի դրա դեմ: Մի լավ բան,այնուամենայնիվ, եղավ: Ես նայում էի իմ լրահոսը՝ Վեհափառի ուղերձը հարյուրապատիկ ավելի տարածվեց: Այնպես որ, իրենց արածը մնաց իրենց»,-հավելեց Հովհաննես Գալստյանը:
Կարդացեք նաև
Գոհար ՀԱԿՈԲՅԱՆ
