Վերջին արձանագրումներով՝ հանրապետության տարբեր բնակավայրերում շուրջ 1000 POS-տերմինալներ կան, որոնք տեղադրվել են կենսաթոշակառուների անկանխիկ գնումների ծրագրի շրջանակներում։ Եվ մինչեւ հիմա այդ պոս-տերմինալներով զրո գործարք է արվել։ Այս մասին կառավարության այսօրվա նիստում ասաց Նիկոլ Փաշինյանը։
«Այստեղ հետեւությունը երկուսը կարող է լինել, առաջինը՝ տնտեսավարողներն իրենք հնարավորություն չեն տալիս անկանխիկ առեւտրի, ինչն օրենքի խախտում է։ Այդ հասցեները կոնկրետ կան, այսինքն՝ մենք գիտենք, թե զրոյական POS-տերմինալներն ում անունով են գրանցված, որտեղ են գտնվում։ ՊԵԿ-ը պետք է կոնկրետ վարչարարություն անի, որովհետեւ կենսաթոշակառուներին եւ նպաստառուներին, ըստ էության, զրկում են այս հնարավորությունից օգտվելու միջոցից։ Բայց ես ուզում եմ երկրորդ հանգամանքն էլ ընդգծել, ես վստահ չեմ, որ հանրապետության բոլոր կենսաթոշակառուները ու նպաստառուները տեղյակ են այս համակարգից եւ պատշաճ հասկանում են։ Հակառակ դեպքում, իրենք էլ իրենց հերթին ճնշում կգործադրեին այդ տնտեսվարողների վրա, որ՝ դուք պարտավոր եք այդ հնարավորությունն ապահովել»,- ասաց Փաշինյանը։ Նա նշեց, որ ավելի քան 500 հազար անկանխիկ թոշակ ստացող թոշակառուներից այսօր 165 հազարն է այս պահին մասնակցում ծրագրին, այսինքն՝ մեծամասնությունն ինչ-որ պատճառով չի մասնակցում։
«Այսինքն՝ մենք ուրախ ենք, որ ամիսը 7 մլրդ դրամ անկանխիկ առեւտուր է տեղի ունենում, բայց հունվարից մեր սպասելիքները փոխվելու են, որովհետեւ պետք է շահառուների թիվը ընդլայնվի, առեւտրի ծավալն ընդլայնվի, եւ աշխարհագրություն այդ շեղումներից պետք է հետ բերենք նորմալ պլանային ու կանխատեսելի իրավիճակի»,- հավելեց նա։
Աշխատանքի եւ սոցիալական հարցերի նախարար Նարեկ Մկրտչյանն ասաց, որ հունվարից ավելի ակտիվ կիրականացնեն հանրային իրազեկման աշխատանքները։ «Ինչո՞ւ հունվարից, այսօրվանից»,- արձագանքեց Փաշինյանը։
Կարդացեք նաև
Ռոզա ՀՈՎՀԱՆՆԻՍՅԱՆ
