Կառավարության հաջորդ նիստում կներկայացվի որոշման նախագիծ, որով կառաջարկվի Պետական գույքի կառավարման կոմիտեին ամրացնել գույք։ Այս մասին կառավարության այսօրվա նիստում ասաց Գլխավոր դատախազ Աննա Վարդապետյանը։ Նա նշեց, որ խոսքն Արարատի մարզի Արմաշ համայնքի նախկին ղեկավարի՝ 2005 թվականի որոշումներով անհատույց օգտագործման իրավունքով Պաշտպանության նախարարությանը տրամադրված հատուկ նշանակության հողամասին է վերաբերում, որն ունեցել է զորամասի կարգավիճակ։
Խոսքը Երասխ-1 եւ Երասխ-2 զորամասերին է վերաբերում։ «Երասխ-1-ի գործը դեռեւս գտնվում է դատաքննության փուլում, իսկ Երասխ-2-ն արդեն կամրացվի Պետական գույքի կառավարման կոմիտեին։ Ազգային անվտանգության ծառայության քննչական դեպարտամենտում նախաձեռնված քրեական վարույթով պարզվել էր, որ Պաշտպանության նախարարի պաշտոնը տվյալ ժամանակահատվածում զբաղեցրած անձը, խախտելով հողային օրենսգրքի պահանջները, ըստ որոնց՝ արգելվում է քաղաքացիներին եւ իրավաբանական անձանց սեփականության իրավունքով փոխանցել պետական եւ համայնքային սեփականություն հանդիսացող հատուկ նշանակության հողերը, հանձնարարել էր կադաստրային արժեքից անհամեմատ էժան գնով օտարել ՊՆ-ին անհատույց օգտագործման իրավունքով տրամադրված հատուկ նշանակության Երասխ-2 տարածքը՝ 0,9 հա մակերեսով եւ դրա վրա առկա շինությունները։ 2023 թվականի փետրվարի 7-ին իմ կողմից Ազգային ժողովի քննարկմանը ներկայացվեց ԱԺ «Հայաստան» խմբակցության ղեկավար, Պաշտպանության նախկին նախարար Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին միջնորդագիր, որը բավարարվեց։ Եվ, ի թիվս այլ պաշտոնատար անձանց, նախկին նախարարի նկատմամբ հարուցվեց հանրային քրեական հետապնդում։ Ներկայումս գործը գտնվում է դատական քննության փուլում»,- ասաց նա։
Աննա Վարդապետյանը նշեց, որ քրեական գործից բացի, Գլխավոր դատախազությունը պետական շահերի պաշտպանության գործառույթի շրջանակներում 2023 թվականի մայիսի 4-ին հայցադիմում է ներկայացրել դատարան՝ ընդդեմ Նորայր Կարապետյանի եւ երրորդ անձ Կադաստրի կոմիտեի՝ պահանջելով անվավեր ճանաչել 2009 թվականի հունվարի 13-ին ՊՆ-ի եւ Նորայր Կարապետյանի միջեւ կնքված առուծախի պայմանագիրը։ 2023 թվականի սեպտեմբերի 11-ին դատավարության մասնակիցների միջեւ կնքվել է հաշտության համաձայնություն եւ ներկայացվել դատարան։ Ըստ Վարդապետյանի՝ հաշտության համաձայնությամբ պատասխանողն ընդունել է Գլխավոր դատախազության պահանջը եւ պարտավորվել օրենքի խախտմամբ ստացված Արմաշ գյուղում Երասխ-2 զորամաս հասցեում գտնվող հատուկ նշանակության հողամասը վերադարձնել Հայաստանի Հանրապետությանը։ Հակակոռուպցիոն դատարանը սեպտեմբերի 12-ի վճռով հաստատել է հաշտության համաձայնությունը, որից հետո նշված անշարժ գույքի նկատմամբ գրանցվել է ՀՀ սեփականության իրավունքը։
Կարդացեք նաև
Ռոզա ՀՈՎՀԱՆՆԻՍՅԱՆ
