«Այսօր նախարար Արարատ Միրզոյանին Թեհրանի համաձայնությունը հայտնեցի ՀՀ գլխավոր հյուպատոսություն Թավրիզում հիմնելու վերաբերյալ, հուսով ենք, որ առաջիկա շաբաթներում իմ գործընկերոջ հետ Թավրիզում ականատեսը կլինենք հյուպատոսության բացման արարողությանը»,-այս մասին այսօր Երեւանում կայացած համատեղ ասուլիսում ասաց Իրանի արտաքին գործերի նախարար Հոսեյն Ամիր Աբդոլլահիանը, որը Հայաստանում է աշխատանքային այցով։
Իրանի ԱԳ նախարարի խոսքով՝ Իրանը լիովին աջակցում է հարավային Կովկասում կայուն խաղաղության հաստատմանը, ինչպես նաեւ տարանցիկ Հյուսիս -հարավ ճանապարհի գործարկմանը․ «Մենք ողջունում ենք խաղաղության խաչմերուկի գաղափարը։ Իրանը ցանկանում է այդ խաղաղությունն ու կայունությունն ապահոված լինի՝ առանց արտաքին ուժերի միջամտության եւ միայն տարածաշրջանային երաշխավորների շնորհիվ կկարողանանք բոլոր ոլորտներում խաղաղություն եւ անվտանգություն ապահովել»։
Աբդոլլահիանն ասաց, որ անդրադարձ է եղել Հարավային Կովկասում խաղաղության հաստատմանը, ինչպես նաեւ այն դերակատարությանը, որը Իրանի Իսլամական Հանրապետությունը կարող է ունենալ՝ որպես ակտիվ երաշխավորի դեր ստանձնել։
«Իրանը աջակցում է ՀՀ տարածքային ամբողջականությանն ու ինքնիշխանությանը։ Իրանը հարեւան Հայաստանի հետ ունեցել է պատմական հարաբերություններ, որոնք ավելի են զարգանում, խորանում ու բարձր մակարդակի հասնում»,-ասաց Իրանի ԱԳ նախարարը։
Կարդացեք նաև
Նելլի ԲԱԲԱՅԱՆ
