«Հենց հիմա եթե ընտրություններ լինեն, իշխանությունը շատ ավելի քիչ ձայներ կհավաքի»,- այսօր լրագրողների հետ ճեպազրույցում ասաց Երեւանի նախկին քաղաքապետ, ավագանու «Ազգային առաջընթաց» խմբակցության ղեկավար Հայկ Մարությանը։
«Նկատեցի՞ք, որ հենց ընտրություններն ավարտվեցին, Ադրբեջանը հարձակվեց Արցախի վրա։ Ինձ համար սա շատ տարօրինակ է առնվազն, ոնց որ սպասեին։ Երկրորդ, բնականաբար, թե երեւանցիները, եւ Հայաստանի ժողովուրդը տեսան իշխանությունների գործողություններն այս կամ այն կրիզիսային իրավիճակներում եւ ամենադժվար իրավիճակներում։ Էլ չեմ խոսում այն մասին, ինչ տեղի է ունենում հիմա։ Այնպես որ, սիրելի երեւանցիներ, ձեր՝ ընտրության չգալը, կարծում եմ, բավական թանկ է նստելու ձեզ համար։ Ցավում եմ, որ այդպես է»,- ասաց նա։
Հայկ Մարությանը, անդրադառնալով հարցին, թե ինչո՞ւ չկարողացավ ընտրություններում 50+ ձայն ստանալ, ասաց․ «Այստեղ ամենալուրջ խնդիրը եղավ մասնակցությունը։ Մարդիկ չուզեցին գալ մասնակցել ընտրություններին։ Քաղաքականությամբ չզբաղվող, ավելի հանգիստ ու կողքից նայող մարդիկ չեն գալիս ընտրություններին, իսկ իրենց կարծիքը կարեւոր է մեզ համար, իրենք մեծամասնություն են։ Այս պահին, երբ մենք ասում ենք՝ փոքրամասնությունների իշխանություն, դա հենց այնպես չէ, այսինքն՝ ամբողջ քաղաքի ընտրողների 28 տոկոսն է եկել, եւ այդ 28 տոկոսի 32 տոկոսը ձայնը տվել է ՔՊ-ին։ Այսինքն՝ Երեւան քաղաքի ընտրողների 8-9 տոկոսն է ձայնը տվել իշխանությանը, սա լուրջ խնդիր է։ Իշխանության համար սա կատաստրոֆա է, իսկ մեզ բոլորիս համար սա լուրջ խնդիր է»։
Ռոզա ՀՈՎՀԱՆՆԻՍՅԱՆ
