Այսօր փոքր, միջին կամ մեծ չափսերի էկրաններն ամենուր են, և աչքերի լարվածությունը, պայմանավորված դրանց ամենօրյա օգտագործմամբ, անհանգստացնում է շատերին՝ դրսևորվելով աչքերի չորությամբ, արցունքահոսությամբ, ոչ պարզ տեսողությամբ, երբեմն էլ՝ գլխացավով։
Մարդիկ, սովորաբար, 1 րոպեում աչքերը թարթում են մոտ 15 անգամ, իսկ համակարգչային կամ հեռախոսային էկրաններն օգտագործելիս, Ակնաբուժության ամերիկյան ակադեմիայի տվյալներով, մարդիկ աչքերը 2 անգամ ավելի քիչ են թարթում, ինչն էլ վերոհիշյալ ախտանշանների առաջացման պատճառներից մեկն է։
Էկրանների դիմաց երկար ժամանակ անցկացնելու դեպքում աչքերի լարվածությունը թեթևացնելու համար Ակնաբուժության ամերիկյան ակադեմիան խորհուրդ է տալիս կիրառել «20-20-20» կանոնը՝ 20 րոպեն մեկ հայացքը հեռացնել էկրանից և նվազագույնը 20 վայրկյան նայել 20 ֆուտ (609.6 սմ) հեռավորության վրա գտնվող որևէ օբյեկտի։
Աչքերի լարվածությունն ու հոգնածությունը կարող են կանխարգելել հետևյալ գործողությունները՝
Կարդացեք նաև
- արհեստական արցունքների օգտագործումը,
- ճիշտ կեցվածքի պահպանումն ու աթոռի կարգավորումն այնպես, որ էկրանն աչքից մոտ 50 սմ հեռավորության վրա լինի՝ 15-20 աստիճան ներքև թեքված,
- փայլատ ֆիլտրի օգտագործումը՝ էկրանի ցոլքերը նվազեցնելու համար,
- էկրանի պայծառության կարգավորումը,
- ակնոցների ու լինզաների օգտագործումն՝ ըստ անհրաժեշտության,
- աչքերը հաճախակի թարթելը։
Ակնաբուժության ամերիկյան ակադեմիայի տարածած հաղորդագրությունում նշվում է, որ չկան հստակ ապացույցներ, որ էկրանների կապույտ լույսը մեծացնում է աչքերի այնպիսի հիվանդությունների վտանգը, ինչպիսիք են ցանցաթաղանթի վնասվածքներն ու մակուլյար դեգեներացիան, ինչը թույլ է տալիս ենթադրել, որ էկրանների օգտագործումը հիմնականում անվնաս է աչքերի համար, եթե կիրառվում են պաշտպանիչ համապատասխան միջոցառումներ։
Պատրաստեց Մարինե ԱԼԵՔՍԱՆՅԱՆԸ
