Քաղտեխնոլոգ, վերլուծաբան Վիգեն Հակոբյանը «Սպուտնիկ Արմենիա» մուլտիմեդիոն մամուլի կենտրոնում տարվա քաղաքական արդյունքները ամփոփելու ժամանակ՝ խոսելով հնարավոր արտահերթ ընտրությունների մասին՝ ասաց. «Քանի որ խոսքն արտահերթ ընտրությունների մասին է, եթե նկատել եք, աղբյուրները հիմնականում իշխանական մամուլն են ներկայացնում: Իրենք, համենայն դեպս, ոչ հերքում են, ոչ հաստատում, բայց, այնուամենայնիվ, արտահոսքերն իրենց ներքին խոսակցություններից ու քննարկումներից են գալիս:
Հիմա արտահերթ ընտրություն անցկացնելը ես տրամաբանական եմ գտնում իշխանության կողմից, որովհետեւ իրենք անընդհատ անցկացնելով տարբեր սոցիոլոգիական հարցումներ, հավատացեք, որ անցկացնում են պարբերաբար եւ շատ հաճախ տեսնում են, որ Նիկոլ Փաշինյանի վարկանիշը, իսկ իշխանության վարկանիշը 99 %-ով պայմանավորված է այդ անձի վարկանիշով, լավագույն դեպքում կամ առանձնապես չի աճում, կամ ամեն անգամ նվազում է: Եվ այս թրենդը պահպանվում է: Վերջին հարցումները՝ հրապարակված կամ չհրապարակված, ցույց են տալիս, որ նրա վարկանիշը 15-ից առավելագույնը 20 տոկոսի շրջանակում է լինում՝ կապված տվյալ պահի իրավիճակից: Այդ իսկ պատճառով, իշխանությունը եւ Նիկոլ Փաշինյանը շատ լավ հասկանում են, որ եթե այդ թրենդը պահպանվի, ինքը կարող է ժամանակ կորցնել:
Հիմա առավելագույնը 20 տոկոս վարկանիշ ունենալով, որը հնարավոր է էլեկտորալ վարկանիշ դարձնել, ցածր մասնակցության պարագայում կարող է վերարտադրվել: Կարծում եմ, ինքը կարող է դա փորձել, առավել եւս, որ 2024 թվականին արտահերթ ընտրությունների է գնում նաեւ Իլհամ Ալիեւը»:
Իսկ թե այդ դեպքում ինչ պետք է անի տիտղոսային եւ ոչ տիտղոսային ընդդիմությունը, որի վարկանիշը նույնպես բավականին ցածր է, Վիգեն Հակոբյանը երկու տարբերակ է տեսնում․ «Քանի որ արտահերթ ընտրությունները բավականին կարճ քարոզարշավ է ենթադրում, պետք է որոշում կայացնի. կամ աշխուժացնում է փողոցը ինչ-որ տրամադրություններ ստեղծել կարողանալու համար, կամ հայտարարելով, թե միեւնույն է, ընտրությունների մեխանիզմով իշխանափոխություն տեղի չի ունենում, կամ հաղթողին ձերբակալում են. կամ տարբեր տեխնոլոգիաներով մեծամասնությանը դարձնում են փոքրամասնություն եւ անում իրենց ուզածը, այսինքն, աշխատում է ռեպրեսիվ ապարատը եւ այդ պատճառով ինքը չի մասնակցում»:
Կարդացեք նաև
Աշոտ ՀԱԿՈԲՅԱՆ
