«Այն ծանրագույն մեղադրանքը, որը ներկայացվել է Ալբերտ Բազեյանին՝ քաղաքական իշխանության բռնազավթման փորձ, խիստ տարօրինակ էր, բայց մեղադրանքի ծանրությունը մեզ ստիպեց սպասել գործի հանգուցալուծմանը: Մեզ համար տարօրինակ էր ձերբակալությունը»,- ԵԿՄ նախկին փոխնախագահ Ալբերտ Բազեյանի կալանքին անդրադառնալով՝ նման կարծիք հայտնեց «Հայոց Աշխարհազոր» ռազմաքաղաքական ՀԿ քարտուղար Վարդան Խաչատրյանը:
Նրա խոսքով. «Մեղադրանքն առ այսօր առկախված է օդում, չունի որեւէ իրավական, որեւէ ուսումնասիրությունների հետեւանքով տրամաբանական շաղկապման հիմքեր, եւ այդ դատարկության մեջ անընդհատ հետաձգվում է Ալբերտ Բազեյանի ազատ արձակվելը, թեկուզ տնային կալանք տալը»:
Խաչատրյանը նկատեց, որ լրանում է Բազեյանի՝ կալանքի տակ մնալու երրորդ ամիսը, իսկ այդ ընթացքում ոչ մի քննչական գործողություն, առերեսումներ չեն եղել, մինչդեռ Բազեյանի առողջական վիճակը գնալով վատթարանում է, գրեթե անդամալույծի կարգավիճակում է. «Ակնհայտ է, որ իրեղեն ապացույցների բացակայության, տրամաբանական փաստարկումից զուրկ, կոպիտ ճերմակ կարկատաններով այս գործը կամայական դատարանում կարող է քանդվել… Դատական ատյանը շարունակում է այս գործը որպես յուրօրինակ պատժամիջոց»:
Նրա խոսքով, Ալբերտ Բազեյանի գործն անհասկանալի, ապօրինությունների դաշտում է գտնվում, իսկ եթե սարքովի գործ է, ինչը իրենց համոզմամբ, հենց այդպես է, ուրեմն, իշխանություններն ունեն ինչ- որ մտահոգություններ, որ Ալբերտ Բազեյանը կարող է լինել այնպիսի առանցքային կերպար, որի շուրջը կարող է համախմբվել հասարակական այնպիսի զանգված, որը վիճարկի երկրում գոյություն ունեցող ընթացքը:
Կարդացեք նաև
Հիշեցնենք, որ ԵԿՄ նախկին փոխնախագահ, Երևանի նախկին քաղաքապետ Ալբերտ Բազեյանին Ազգային անվտանգության ծառայությունը մեղադրում է վարչապետ Փաշինյանի դեմ մահափորձ եւ իշխանության զավթումը կազմակերպելու համար։
Արփինե ՍԻՄՈՆՅԱՆ
