Խաչատրյանի անվան 11-րդ միջազգային փառատոնի փակման համերգին Հայաստանի պետական սիմֆոնիկ նվագախմբի հետ ելույթ ունեցավ անվանի թավջութակահար Աստղիկ Սիրանոսյանը՝ կատարելով Արամ Խաչատրյանի Թավջութակի կոնցերտը։ Երեկոյի ընթացքում նվագախումբը կատարեց նաև Արամ Խաչատրյանի կինոերաժշտությունը։
Համերգը ղեկավարում էր նվագախմբի ընթացիկ համերգաշրջանի գլխավոր հրավիրյալ դիրիժոր Ջանլուկա Մարչիանոն։
Աստղիկ Սիրանոսյանը նշում է‚ որ Խաչատրյանի Թավջութակի կոնցերտը խիստ հոգեհարազատ է իրեն‚ և փորձում է հաճախ կատարել Եվրոպայում։ 2018 թվականին այն նաև ձայնագրել է։ «Խաչատրյանի այս կոնցերտը շատ նման է իմ կենսագրությանը։ Հայկական երաժշտության բոլոր ելևէջներն առկա են այս ստեղծագործության մեջ։ Երբ նվագում եմ այն‚ ասես մի ճամփորդություն կատարեմ դեպի Հայաստան։ Այն‚ ինչ կարողացել է անել թավջութակի հետ Արամ Խաչատրյանը‚ ուղղակի հրաշք է։ Մենք՝ որպես հայ‚ բախտավոր ենք‚ որ թավջութակի համար գրված այսպիսի գեղեցիկ ստեղծագործություն ունենք»‚- ասում է Աստղիկ Սիրանոսյանը։
Աստղիկ Սիրանոսյանը Հայաստանի պետական սիմֆոնիկ նվագախմբի հետ ելույթ է ունենում ոչ առաջին անգամ։ Նշում է‚ որ իրեն ոգևորում են սիմֆոնիկ նվագախմբի երաժիշտների էներգիան‚ պատրաստակամությունը։
Կարդացեք նաև
Քշիշտոֆ Պենդերեցկու անվան թավջութակի միջազգային մրցույթի առաջին մրցանակի հաղթող և հատուկ մրցանակների բազմակի դափնեկիր Աստղիկ Սիրանոսյանը որպես մենակատար ելույթ է ունենում մեծ ճանաչում վայելող նվագախմբերի հետ։ Արտիստը նվագում է 1676թ. Ֆրանչեսկո Ռուջերիի կողմից պատրաստված թավջութակը, որը երաժշտին է տրամադրվել Բինինգենի «Բուբո» երաժշտական հիմնադրամի կողմից‚ և Ջեննարո Գալիանոյի պատրաստած «Սըր Ջոն Բարբիրոլլիի» թավջութակը՝ տրամադրված «Henrot pour la Musique» հիմնադրամի կողմից։
Հիշեցնենք‚ որ Խաչատրյանի անվան 11-րդ միջազգային փառատոնը կազմակերպվել էր «Արամ Խաչատրյան» մշակութային հիմնադրամի և Հայաստանի պետական սիմֆոնիկ նվագախմբի համատեղ ջանքերով։ Փառատոնի անցկացմանն աջակցում էր ՀՀ կրթության‚ գիտության‚ մշակույթի և սպորտի նախարարությունը։ Երևանի քաղաքապետարանը փառատոնի գլխավոր հովանավորն էր։
Հայաստանի պետական սիմֆոնիկ նվագախումբ
