ՄԱԿ-ի Գլխավոր ասամբլեան ձայների 153 կողմ, 10 դեմ և 23 ձեռնպահ ձայների հարաբերակցությամբ ընդունեց Սաուդյան Արաբիայի, Արաբական Միացյալ Էմիրությունների, Եգիպտոսի, Պաղեստինի և 17 այլ պետության կողմից ներկայացված բանաձևը, որը, լուրջ մտահոգություն հայտնելով Գազայի հատվածում ծավալվող աղետի, պաղեստինցի խաղաղ բնակիչների տառապանքների և միջազգային մարդասիրական իրավունքի համաձայն պաղեստինցի և իսրայելցի խաղաղ բնակիչներին պաշտպանելու անհրաժեշտության առնչությամբ՝ կողմերին պահանջում է անհապաղ մարդասիրական հրադադար հաստատել, առանց նախապայմանի անհապաղ ազատ արձակել բոլոր պատանդներին, արտոնել մարդասիրական հասանելիություն և հարգել մարդասիրական պարտավորությունները, հատկապես խաղաղ բնակիչներին պաշտպանելու հետ կապված:
Հայաստանը կողմ է քվեարկել բանաձևին: Կողմ են արտահայտվել նաև Ռուսաստանը, Ֆրանսիան, Իրանը, Ադրբեջանը, Թուրքիան, Չինաստանը, Հնդկաստանը:
Դեմ քվեարկող 10 երկրներից էին Իսրայելը և ԱՄՆ-ն:
Ի թիվս այլ պետությունների` Վրաստանը, Գերմանիան և Ուկրաինան ձեռնպահ մնացին քվեարկության ժամանակ:
Կարդացեք նաև
Նախքան բանաձևի ընդունումը, ավստրիական պատվիրակությունն առաջարկեց ամրագրում մտցնել բանաձևում, ըստ որի՝ պատանդների ազատ արձակմանն առնչվող մասում կնշվեր, որ պատանդները պահվում են «ՀԱՄԱՍ-ի և այլ խմբավորումների կողմից»: Ավստրիացիներն առաջարկում էին նաև «մարդասիրական հասանելիություն» եզրույթից առաջ ներդնել «անհապաղ» բառը:
89 կողմ, 61 դեմ և 20 ձեռնպահ ձայներով Գլխավոր ասամբլեան մերժեց ավստրիական առաջարկությունը:
Հայաստանը կողմ էր: Կողմ էին նաեւ Իսրայելը, ԱՄՆ-ն, Վրաստանը, Ուկրաինան, Ֆրանսիան, Գերմանիան, Հնդկաստանը:
Դեմ արտահայտվեցին Պաղեստինը, Իրանը, Ռուսաստանը, Թուրքիան, Չինաստանը և Պաղեստինին հավատարիմ արաբական երկրները:
Ադրբեջանը քվեարկությանը չմասնակցեց:
Ամերիկյան կողմի առաջարկը, որով Գլխավոր ասամբլեան անվերապահորեն կմերժեր և կդատապարտեր «հոկտեմբերի 7-ին ՀԱՄԱՍ-ի կողմից ձեռնարկված զազրելի ահաբեկչական հարձակումն Իսրայելի վրա, ինչպես նաև անձանց պատանդավորումը», նույնպես չընդունվեց:
Կողմ էր 84 պետություն, դեմ՝ 62, ձեռնպահ՝ 25: Հայաստանը կողմ քվեարկեց, իսկ քվեարկության պատկերը գրեթե նույնն էր: Ադրբեջանը կրկին չմասնակցեց քվեարկությանը:
Արսեն ԱՅՎԱԶՅԱՆ
