Այսօր Տավուշի մարզի առաջին ատյանի դատարանի Իջեւանի նստավայրում ԱԺ նախկին պատգամավոր, ՀՅԴ Գերագույն մարմնի նախկին անդամ Սուրեն Մանուկյանի գործով դատական նիստն էր: Հիշեցնենք, որ նա մեղադրվում է նախկին պատգամավոր, գործարար Խաչատուր Քոքոբելյանի հորը առևանգելու համար։
Սուրեն Մանուկյանի պաշտպան, փաստաբան Սերգեյ Ոսկանյանն Aravot.am-ի հետ զրույցում ասաց, որ Սուրեն Մանուկյանը ինչպես նախկինում, այնպես էլ հիմա չի ընդունում իրեն առաջադրված մեղադրանքը: Չի փոխվել նաեւ Խաչատուր Քոքոբելյանի դիրքորոշումը. «Նույնն են, բողոքում են, բողոքավոր են»:
Դատական նիստում կողմերը հանդես են եկել բացման խոսքով, հետո անցել են գրավոր ապացույցների հետազոտման փուլին: Պաշտպաններից մեկը, քանի որ այլ գործով նիստի էր, միջնորդություն է ներկայացրել, որ նիստը հետաձգվի:
Հաջորդ նիստը նշանակվել է դեկտեմբերի 21-ին:
Կարդացեք նաև
Այս քրեական գործով դատական նիստերը նշանակվում են մեծ ընդմիջումներով։ Ս․ Մանուկյանը անազատության մեջ է 2022թ․ օգոստոսի 11-ից, մինչև հիմա դատարանում ոչ մի վկա չի հարցաքննվել, ոչ մի ապացույց չի հետազոտվել։
Հռիփսիմե ՋԵԲԵՋՅԱՆ
