«Մենք ուղղակի 30 տարի ժամանակ ենք վատնել ու մեր ժամանակը եւ ռեսուրսները ծախսել ենք մի խնդրի վրա, որը, ի սկզբանե, անլուծելի էր: Ինչո՞ւ, նաեւ ՄԱԿ-ի անվտանգության բանաձեւերի պատճառով: Մեզ հիմա մեղադրում են, թե դուք ասացիք՝ հետամուտ կլինենք ԼՂ ինքնորոշման իրավունքին ու հետամուտ չեղաք: Ամբողջ խնդիրն այն է, որ մենք ոչ միայն ասել ենք, այլեւ փորձել ենք հասկանալ՝ ինչ է նշանակում ինքնորոշման իրավունք: Ինքնորոշման իրավունք տերմինը միջազգային հանրությունն է ստեղծել, մենք չենք ստեղծել: Միջազգային հանրությունը 1996-ի դեկտեմբերի 6-ին, Լիսաբոնի գագաթաժողովում տեղի ունեցած քննարկումների արդյունքով, ըստ էության, մեզ ասել էր հետեւյալը՝ ինքնորոշման իրավունքի ձեր բարձրագույն նշաձողը կարող է լինել ինքնավար կարգավիճակը Ադրբեջանի կազմում»,- այսօր ՔՊ նիստում ասաց վարչապետ Նիկոլ Փաշինյանը:
Նրա խոսքով, իրենք գնացել են այս տրամաբանության հետեւից ու նաեւ իրենց մեղավորությունն ու մեծագույն սխալն այն է, որ այս թեմաներով քիչ-քիչ սկսել են ժողովրդի հետ խոսել 44 օրյա պատերազմից հետո. «Ես ինձ մեղավոր եմ համարում այս խոսակցությունը չտանելու համար»,- ասաց Փաշինյանը:
Արփինե ՍԻՄՈՆՅԱՆ
