ԱԺ նիստում քննարկվեց «Զբոսաշրջության մասին» օրենքի նախագիծը:
Այս նախագծով զբոսաշրջային գործունեությունը դառնում է ծանուցման ենթակա, սահմանվում են միջազգային մեխանիզմներ՝ զբոսավարներին որակավորելու համար, զբոսաշրջային օպերատորների համար սահմանվում են պահանջներ՝ պայմանագրի կնքման, ֆինանսական երաշխիքների մասին:
Էկոնոմիկայի նախարար Վահան Քերոբյանն ասաց, որ այս տարվա 10 ամիսներին 2 մլն-ից ավելի զբոսաշրջիկ է այցելել Հայաստան, օրենքի ընդունումը նպատակ ունի կարգավորել ներգնա ու արտագնա զբոսաշրջությունը: Զբոսաշրջային օպերատորները չեն աշխատելու այն զբոսավարների հետ, որոնք որակավորված չեն:
«Հայաստան» խմբակցության պատգամավոր Արթուր Խաչատրյանը Վահան Քերոբյանին հարցրեց՝ նախագծում կա «սփյուռքահայ զբոսաշրջիկ» արտահայտությունը, ո՞րն է սահմանումը, մեր երկիր եկած մարդկանցից քանի՞սն են իրոք եկել զբոսնելու ու շրջելու համար, քանի՞սն են եկել աշխատելու, ո՞նց հստակ հասկանանք՝ ով է տուրիստ:
Կարդացեք նաև
Վահան Քերոբյանը պատասխանեց. «Մենք բոլորս գիտենք, որ սփյուռքահայ զբոսաշրջիկներին շատ ավելի հեշտ է համոզել գան իրենց պատմական հայրենիքը, նախնիների ծննդավայրը, քան թե եթե նրանք հայ չեն: Մեր զբոսաշրջության ռազմավարությամբ որոշվել է սփյուռքահայ զբոսաշրջիկը որպես առանձին կատեգորիա նշել»: Ինչ վերաբերում է տուրիստներին գնահատելուն, նա ասաց, որ վիճակագրություն կա, որը շեղումներ ունի ամբողջ աշխարհում:
ՔՊ պատգամավոր Սոնա Ղազարյանն ասաց, որ Արթիկում վերջերս այցելել է սուրբ Գեւորգ եկեղեցի, որի կեսը դեռ վերականգնված չէ ու անգամ ցուցատախտակ չկար: Նա ասաց, որ Ակրոպոլիսը ամեն ժամ 2000 զբոսաշրջիկ ունի, իսկ Էրեբունի ամրոցով մենք չենք զբաղվում: Նա նաեւ խորհուրդ տվեց Քերոբյանին. «Խնդրում եմ աշխատաշուկայում սեռով պայմանավորված բաժանումներ մի արեք, նրբանկատ գտնվենք, հեռվանանք այն կարծրատիպերից եւ այդ սեքսիստ մոտեցումներից»:
«Հայաստան» խմբակցության պատգամավոր Գառնիկ Դանիելյանն ասաց, որ զբոսաշրջիկի համար հենց սկզբից պետք է պայմաններ լինեն. «Զբոսաշրջիկը Հայաստանի տարբեր մարզերում լինում է, պետքարանների խնդիր կա: Այն պատմամշակութային վայրերը, որտեղ այցելում են, այնտեղ հավաքված աղբի հարցը պատկան մարմինները գոնե պիտի լուծեն: Զբոսաշրջիկը գալիս եւ զարմանում է, որ մեզ համար սրբություն հանդիսացող վայրի աղտոտված, կեղտոտված հարակից տարածքներից: Այդ վիճակը մեզ պատիվ չի բերում: Պետք է պատիժները խստացնել»:
Բաբկեն Թունյանը խոստացավ «սփյուռքահայ զբոսաշրջիկ» արտահայտության հետ կապված քննարկել ու վերանայել:
Հռիփսիմե ՋԵԲԵՋՅԱՆ
