«ՀՀ-ն Խաղաղության պայմանագիրը կստորագրի այն ժամանակ, եթե վստահ լինի, որ դա ի շահ Հայաստանի է լինելու եւ ի շահ տարածաշրջանային խաղաղության եւ կայունության»,- այսօր լրագրողների հետ զրույցում ասաց ԱԺ արտաքին հարաբերությունների հանձնաժողովի նախագահ Սարգիս Խանդանյանը:
Թե ո՞ր հարթակում պետք է բանակցությունները շարունակվեն՝ արեւմտյա՞ն, թե՞ ռուսաստանյան՝ Խանդանյանն ասաց, որ լավ կլինի բանակցությունների տրամաբանության շարունակականությունն ապահովի. «Ձեւավորվել է մի տրամաբանություն, որ արտգործնախարարների մակարդակով ընթացել են բանակցությունների ռաունդներ Վաշինգտոնում եւ երկրների ղեկավարների մակարդակով Բրյուսելում եւ լավ կլինի ամեն ինչ նոր կետից չսկսելու համար այդ շարունակականությունն ապահովել»:
Ադրբեջանում արտահերթ նախագահական ընտրություններ են, կարո՞ղ է դա ձգձգի բանակցությունները՝ Սարգիս Խանդանյանը պատասխանեց. «Հույս ունեմ, որ դա չի լինի հերթական պատրվակը Ադրբեջանի համար բանակցությունների չմասնակցելու: Թե ինչ ներքաղաքական պատճառներ ունի՝ չեմ կարող ասել, ինձ համար էլ է դա լուր ու անսպասելի լուր»:
Հարցին՝ ՌԴ-ից այսպես են մեկնաբանում Հայաստանի՝ Արեւմուտքից ձեռք բերված զենքերը, օրինակ, Լավրովի խոսնակն ասում է՝ դրանք, կոպիտ ասած, պետք է գցեին մի կողմ, տալիս են Հայաստանին, ինչպե՞ս կմեկնաբանեք՝ Խանդանյանը պատասխանեց. «Ես ռազմական մասնագետ չեմ, բայց կարծում եմ, որ Հայաստանը շատ լավ ուսումնասիրում է, թե ինչ զինամթերք է ձեռք բերում եւ այն փոխվստահությունը, որ կա մեր եւ այն գործընկերների միջեւ, որոնք ՀՀ-ին պաշտպանական միջոցներ են տրամադրում, շատ ապահով են»:
Կարդացեք նաև
Նա հորդորեց պաշտպանական գերատեսչության հետ խոսել այդ մասին՝ համոզվելու որ մեկնաբանությունները, որոնք արվում են ռուսական կողմից, տրամաբանական եւ ստույգ չեն:
Հռիփսիմե ՋԵԲԵՋՅԱՆ
