Այսօր ԱԺ-ում փոխարտգործնախարար Մնացական Սաֆարյանը ներկայացրեց «Դիվանագիտական ծառայության մասին» օրենքում փոփոխությունների նախագիծը, որով առաջարկվում է դիվանագիտական ծառայության պաշտոն համարվող գլխավոր քարտուղարի պաշտոնը դարձնել քաղաքացիական ծառայության պաշտոն:
«Հայաստան» խմբակցության պատգամավոր Արթուր Խաչատրյանը հարցրեց, թե Հայաստանում զբոսաշրջային վիզա տալի՞ս են, օրինակ, երբ օտարերկրացին գալիս է ոչ թե Գառնի, Գեղարդ գնալու, այլ՝ ինչ-որ մի գործարանի արտադրական պրոցեսի հետ կապված մասնակցելու, ի՞նչ վիզա են տալիս:
Փոխնախարարը պատասխանեց, որ իրականում խնդիր կա՝ նոր արտոնագիր սահմանելու՝ այդ իրավիճակի հետ կապված:
ՔՊ պատգամավոր Խաչատուր Սուքիասյանը տեղից ինչ-որ բան ասաց, Արթուր Խաչատրյանն արձագանքեց. «Հերիք չեղա՞վ, 2 մլն տուրիստ եք բա բերում»:
Կարդացեք նաև
ԱԺ նախագահ Ալեն Սիմոնյանը դիտողություն արեց. «Պարո՛ն Սուքիասյան, պարո՛ն Խաչատրյան, վերջացրե՛ք իրար հետ զրույցը հլը»:
«Դուք էլ վերջացրեք, պարոն Արշակյանի հետ էիք խոսում»,- արձագանքեց Սուքիասյանը, ինչը բարկացրեց Ալեն Սիմոնյանին: Նա ասաց. «Այսի՞նքն: Պարոն Սուքիասյան, խնդրում եմ ինձ նկատողություն մի արեք»: Սուքիասյանը «տակ չմնաց». «Դուք էլ ինձ նկատողություն մի արեք»:
Թեման փակեց Մնացական Սաֆարյանը, հանգիստ տոնով շարունակելով իրեն ուղղված հարցերի պատասխանը հնչեցնել:
Հռիփսիմե ՋԵԲԵՋՅԱՆ
Արխիվային լուսանկարը՝ «Հրապարակի»
