«Երեկ Ալավերդիում բախվել էին ժողովրդավարությունը եւ զոռբայությունը, հաղթեց օրենքը»,- այսօր ԱԺ-կառավարություն հարցուպատասխանի ժամանակ հայտարարեց ՏԿԵՆ նախարար Գնել Սանոսյանը՝ ի պատասխան Ալավերդիի երեկվա միջադեպի մասին հարցի:
ԱԺ նախագահ Ալեն Սիմոնյանն արձագանքեց, որ քրեական գործի տարրեր միանշանակ կան՝ ընտրական պրոցեսը տապալելու համար:
Գնել Սանոսյանն ասաց, որ այն, ինչ երեկ Ալավերդիում տեղի է ունեցել, ամբողջովին օրինական է, ՏԻՄ օրենքի բոլոր կետերը պահպանված են, որեւէ օրենք չի խախտվել: Նախարարը շնորհակալություն հայտնեց ոստիկանությանը եւ ասաց, որ քվեատուփը շուռ տալու, համայնքապետարանի առջեւ կատարվածի մասով իրավապահ մարմինները պետք է գնահատական տան:
Ըստ նախարարի, բոլոր կանոնների համաձայն, Ալավերդիում ընտրվել է նոր քաղաքապետ:
Կարդացեք նաև
Հիշեցնենք, որ ՔՊ-ականները Ալավերդու համայնքապետ Արկադի Թամազյանին անվստահություն հայտնելու եւ իշխանության ներկայացուցիչ Դավիթ Ղումաշյանին համայնքապետ ընտրելու գործընթաց էին նախաձեռնել:
Սանոսյանն ասաց, որ համայնքում մի շարք աշխատանքներ պլանավորածից հետ էին ընկել, ընթացք չէր տրվում, համայնքի բնականոն կյանքը խաթարված էր:
Հռիփսիմե ՋԵԲԵՋՅԱՆ
