Ալավերդի համայնքի ավագանու խնդրահարույց եւ սկանդալային նիստի ավարտից հետո, երբ միայն իշխանական ավագանիները անվստահություն հայտնեցին ընդդիմադիր համայնքապետին եւ նոր համայնքապետ ընտրեցին իրենց թեկնածուին, «Հայ ազգային կոնգրեսի» փոխնախագահ Լեւոն Զուրաբյանը, դիմելով համայնքապետարանի առջեւ հավաքված ալավերդցիներին՝ ասաց․ «Ես գիտեմ, թե ինչ ճնշումներ են կատարվում։ Եվ ընդհանրապես, մարզերում ժողովուրդը ավելի խոցելի է։ Բայց դուք այդ ամեն ինչն անտեսելով եկաք պայքարելու ձեր իրավունքների, ձեր ձայնի համար։ Ես ողջունում եմ ձեր արժանապատվության զգացումը, արդարության ձեր ձգտումը։
Ինչ կատարվեց։ Այսօր իշխանությունը օգտագործելով իր ուժային լծակները՝ ապօրինաբար ջարդելով նիստերի դահլիճի դռները եւ դրա համար հրավիրելով ԱԻՆ-ին՝ ոստիկանությունն է դա արել, եւ կազմակերպել է այդ ապօրինի նիստը։
Օրենքը պահանջում է, որ եթե նիստն սկսում ես ժամը 10-ին, պետք է կես ժամ սպասին համայնքապետի ներկայությանը, արձանագրեին, որ համայնքապետը չի ներկայացել, որից հետո եւս կես ժամ սպասեին համայնքապետի տեղակալին, արձանագրեին, որ նա նույնպես չի ներկայացել եւ դրանից հետո նիստը վարողը պետք է դառնար ներկաներից տարիքով ամենամեծը։ Իսկ իրենք, քանի որ իշխանության սովորական գողեր են՝ իշխանագողեր, արել են հետեւյալը։ Հենց որ ուժային կառույցների ապօրինի աջակցությամբ ժամը 10-ին հավաքվել են այդ սենյակում, առանց կատարելու ընթացակարգային օրինական այս գործողությունները, անմիջապես անցել են երրորդ քայլին։ Բնականաբար համայնքապետը տեսնելով, որ կատարվում է նման ապօրինություն՝ կապված եւ նիստի իրավազորության եւ ընթացակարգային խախտումների հետ, ժամը 10։25-ին մեր բոլորի ուղեկցությամբ մտել է նիստերի դահլիճ՝ բացատրելու համար այն 14 օրինազանցներին, որ այն, ինչ իրենք անում են, օրենքի խախտում է։ Այդպես պետք է վարվեր ցանկացած պատասխանատու համայնքապետ։ Եվ երբ մենք ներս մտանք, արձանագրեցինք մի քանի փաստ։ Եվ դա տեղի է ունեցել մամուլի ներկայությամբ։ Ցույց տրվեց, որ այնտեղ քվեաթերթիկներ էին նախապատրաստվել ու արդեն տեղի է ունեցել քվեարկություն։ Այդ ամենը նրանք չէին կարող, քանի դեռ չէին արել օրինակամ ընթացակարգային քայլերը։
Կարդացեք նաև
Եվ երբ այս ամենը մամուլի ներկայությամբ արձանագրվեց, ՔՊ-ն անցավ այն միակ զենքին, որին իրենք տիրապետում են կատարելությամբ։ Դա սադրանքն է, գյադայությունը, խուժանությունը։ Իրենք անցան իրենց հարազատ ոճին։ Սկսեցին վիրավորանքներ տեղալ համայնքապետի եւ մնացածների նկատմամբ, սկսեցին քաշքշել։ Այսինքն, իրենց պահում էին սովորական գողի նման, որի ձեռքը գողության պահին մենք բռնել ենք»,-ասաց Լեւոն Զուրաբյանը։
Աշոտ ՀԱԿՈԲՅԱՆ
